بەیانیێ

هۆرام: ئەرەمەرزنای پەکەکە-ی ئەۋەژیۋای نەتەوەو کوردی بێ .

پلاتفۆرمو هۆرامی ٢٧و نۆڤەمبەری ساڵیادو ئەرەمەرزنای پەکەکە-یش پیرۆز کەرد و ئاشکارش کەرد: ئەرەمەرزناکەی پەی نەتەوەو کوردی سەرجەنۊ ئەۋەژیوای بێ.

جە بەیاننامەکەو پڵاتفۆرموو هۆرام-ی ئامان :

جە وەختێنە پ.ک.ک ٤٣ مین ساڵڕۆو ئەرەمەرزنایرەو وێش جەژنە مەگێرۆ، کە خەبات و مدرامانش بە ڕابەری بەرێز ئۆجالانی مەرزەکاو کوردستانی و وەرکەوتوو دڵێراسەیش بڕیەنێ. هەرپاسە جە فرەو وەڵاتەکاو تەری بە بۆنەو جیاوازی فەڵسەفەو کۆشیای پەکەکە-ی پەی یاوای بە ئازادی ، یەکسانی ژەن و پیای و پێوەرەژیوای گەلا، فرەو ئازادیوازا، بە تایبەت چالاکێ بەشو ژەنا ڕووەشا کەردێنە ئا پارتەیە . پەکەکە جا ئاژەو ئاڕۆ وەرکەوتوو دڵێراسەینە سەرەڕاو گەلوو کوردی ، بییەیش بییەن بە ڕاسینەو کۆشیای نەتەوەکا و چینە جیاوازەکێ تەرێ . ئانە کە پەکەکە جە ماوەو ٤٣ ساڵی ویەردێنە تا بە ئارۆ پێش کۆشیان ، ژیوایە ئازاد ، گەلمیر ، ئێکۆڵۆژی و یەکسان بییەن .

جە سێبەرەو خەباتوو پەکەکە-یەنە بە مدرامان و ڕابەر ئۆجالانی و گەریلا سەربەرزەکاو کوردستانی، نەتەوەو کوردی بی بە ساحێب و فەلسەفە ، مانیفستۆ و سیستمو وێریکوزتەو وێش . بە پێچەوانەو حزبێ و لایانەکا تەرو وەڵێ پەکەکە-ی، کە مەسەڵێ کوردی گیرش واردەبێ دەسو خانەوادە ، عەشیرەت و لایەنەکاوە، بەرکەوتەو پەکەکەی پەرسەو کوردی بی بە خواست و گردو چینە جیاوازەکاو کوردستانی و ئا گیرواردەیە دماییش ئاما. بەشداری شناسە جیاوازەکاو کۆمەڵگاو کوردستانی جە خەباتی نەتەوەیینە، بەروستەو ئی ڕاسییەیەنە. جە گردی گرنگتەر پەرسەو کوردی جە مەسەڵێوە هەرێمی بی بە پەرسێوە جیهانییە . سەرو ئا ئەساسەیە گرد کوردێ وەڵاتپارێز و ئازادیواز نمەتاوۆ کۆشیای و مدرامان و ڕابەر ئۆالانی و پەکەکە-ی پەی پارێزناو شناس و مافەکاو کوردی نەوینۆنە .

پسۆ پڵاتفۆرموو هۆرام-ی سەرەڕاو مۆبارەکبایی کەردەو ئی ڕوە پیرۆزەیە جە کەس و کاروو شەهیدا ، ڕابەر ئاپۆی ، گریڵاکا کوردستانی ، گەلەکەیما و بە تایبەت ژەنا ، هیواو ئازادی پێ ڕابەر ئۆجەڵانی جە زیندان و تاکەکەسی ئیمڕاڵی و یاوای نەتەوەکەیما بە مافەکا وێش جە هەر چوار پارچەو کوردستانی وازمێ . جارێ تەر ڕۆ ئەرەمەرزنایڕەو پەکەکەی ، پسۆ ڕۆ ژیوایۆ نەتەوەو کوردی و گێڵایۆ کەرامەتی ئینسانی پێ گەلەکەیما و بە تایبەت ژەنا وینمێ . داواما ئانێنە کە جە ٤٣ مین ساڵڕۆنە ، چالاکا بەشوو ژەنا ، ژیوگەی ، مەدەنی و سیاسی و رووناکویرا بە درێژەدای بە ڕاو شەهیدا ، پێ یاوای بە ژیوایە ئازاد و یەکسان و ئێکۆڵۆژی ئەرکی نەتەوەیی و ئینسانی وێشا جە وەرانوەروو فاشیزمی نەتەوەیی و دیکتاتورە داگیرکەرەکا کوردستانی یاگێ بارا .

ڕاوەبەری پڵاتفۆرموو هۆرام-ی

٢٥-١١-٢٠٢١

Z