کۆگاو نەورۆزو هۆرامانی ئاشکراش کەرد: ئاهەنگۍ و پیرۆزباییەکۍ ئێساڵو هەورامانی بە دروشمو “نەورۆز هێماو یۆگێرتەی، ئازادی و پێوەرەژیواین” ئەنجامێ مڎریانێ و چنڎ ڕانمۆنیێش پەی نەورۆزی وستۍڕووە.
کۆگاو نەورۆزو هۆرامانی بە ئامانجو ڕێکوستەو ئاهەنگۍ و پیرۆزباییەکۍ نەورۆزەکاو هۆرامانی پەیامێش وەلاوکەردەوە. جە پەیامەکەنە باس جە ئانەی کریان؛ جە دێرزەمانەوە نەورۆز ، جە لاو نەتەوەکەیماوە پسۆ ڕۆو سەرهۆردای و مدرامانی وەرانوەر بە ئەرەگێرتەیی (داگیرکاری) و نەیارا ئازادی و یەکسانی وینیان و تا ئاڕۆیچ ئی باوەڕیە پسۆ یۆ جە هێماکاو نەورۆزی وینیۆ. هەر پەوکەی کۆگاو نەورۆزو هۆرامانی بە ئامانجوو ڕێکوستەو نەورۆزەکاو ئێساڵی جە دەگایا و شارەکاو هۆرامانی بە ئەرکو وێش مزانۆ پەی ڕێکوستەو مەراسمەکاو نەورۆزی چنڎ خالێ دەسنیشانێ بکەرۆ:
خەڵکو وەشەویسو کوردستانی بەگردیی و بە تایبەت دیارو هۆرامانی، هەر پاسە کە مزاندێ نەورۆز پسۆ یۆ جە جەژنە تایبەتەکاو نەتەوەو کوردی بە هەزاران ساڵان بە شێوە جیاکا پیرۆز مکریۆ . نەورۆز سەرەراو گردو تایبەتمەندیەکاش ، جە لاو نەتەوەکەیماوە پسۆ ڕۆو سەرهۆردای و مدرامانی جە وەرانوەروو داگیرکاری و نەیارا ئازادی و یەکسانی وینیان . تا ئاڕۆیچ ئی باوڕیە پسۆ یۆ جە هێماکاو نەورۆزی موینیۆ . دیارو هۆرامانی بە بۆنەو سرووستی تایبەت ، تاریخی کۆن و دێرین و فەرهەنگی دۆڵەمەندیش، یۆ جە ئا یاگانە کە ساڵانە مەراسمەکاو نەورۆزی بە گەرمی و شێوەی تایبەت چەنەش ڕێکێوزیەینۍ . ئاهەنگۍو پیرۆز باییەکۍ نەورۆز دیارو هۆرمانی جە چڎن ساڵۍ ویەردێنە سەلەمنای ئی ڕاسیەنێ . هەر پەوکەی کۆگاو نەورۆزو هۆرامانی بە ئامانجو ڕێکوستەو نەورۆزەکاو ئێساڵی جە دەگایا و شارەکاو هۆرامانی بە ئەرکو وێش مزانۆ پەی ڕێکوستەو مەراسمەکاو نەورۆزی چڎن خالێ دەسنیشانێ بکەرۆ بە ئی جۆرە:
١- درۆشمە: نەورۆزەکاو ئێساڵی بە دروشمەو (نەورۆز هێماوە یۆگێرتەی ، ئازادی و پێوەرە ژیواین) پیرۆزۍ کریانێ.
٢- پارێزناو ژیوگەی: هەر پاسە کە مزاندێ نەورۆز جەژنێوەنە کە چەنی سرووشتی
پەیوەندییە تایبەتش هەن . سەرو ئا ئەساسەیە داوا مکریۆ جە هەر یاگێنە کە
مەراسمەکۍ نەورۆزی ڕیکوزیانۍ، چڎن ڕوێ وەڵێ ئانەینە هەڵمەتەو پاک کەردەیۆ
ژیوگەو جە ئا یاگا و جە دگایا بۆ یا شارا یا گەرەکەکانە ئەنجام بدریۆ.
٣- ئاشتەوایی کۆمەڵایەتی: گرفتەکۍ ژیوای ئارۆی کە بەرهەمو سیستمو
سەرمایەدارینێ ، پاسەش کەردەن کە فرە کەسێ ناوەشی بگنۆنە بەینشا . یاگۍ
وێشەنە کە بە ئامانجو یۆگێرتەی کۆمەڵگای جە دەگایا و و شارەکانە ، کۆگۍ
بەنامێ کۆگاو (ئاشتەوایی کۆمەڵایەتی) سازێ بکریانۍ. نەمەنەی گرفتە
کۆمەڵایەتیەکا ، هێزو کۆمەڵگای فرەتەر مکەڕۆ.
٤- بەشداری زارۆڵا بە جلوبەرگی کوردی: زاڕۆڵێ دماڕۆو پارێزنای کەلتوور و
فەرهەنگ و نەتەوەکەیمانۍ .پەوچی بەشداری کەردەیشا جە مەراسمەکاو نەورۆزیەنە
بە دەنگ و ڕەنگ و وێشا و بە پۆشای جلوبەرگی کوردی زامنوو پارێزناو ئا
فەرهەنگ و کەلتووریمانۍ.
٥- بەشداری ژەنا: ژەنی سەرچەمەو ژیوای و مەنەیۆ مرۆڤایەتینێ. نەقشو ژەنا جە
ڕێکوستەو مەراسمەکاو نەورۆزیەنە یاواینەنە جە ڕاسی پەیامو نەورۆزی .
ئازادی و یەکسانی ژەنێ و پیای جە هۆرامانەنە ، جە دێڕ زەمان تا ئارۆ
بنەڕەتو بەردەوامی ژیوایە دیموکراتیکی بییەن . پەنەوازەن ئێساڵیچ نەقشو
ژەنا جە مەراسمەکاو نەورۆزینە وەرچەم بگیریۆ .
٦- کەردەیۆ ئایری : ئایر پسۆ بەشێ جە سرووشتی کە بە هەزاران ساڵێن خزمەت و
ژیواو ئینسانەکاش کەردەن ، پیرۆزی وێش هەن . ئایر هێماو ڕووناکی و
پارێزناو ئینسانی بییەن جە گردو وەختەکانە . ڕێزگێرتەی جە ئایری ،
ڕێزگێرتەیا جە تایبەتمەندیەکاو سرووشتی . پەوچی کەس یا کەسانێ کە ئایرو
نەورۆزی مکەراوە مشۆم لایقێ ئی پیرۆزیەیە بانۍ. بە تایبەت ئا کەسێ کە جە
خزمەت و ژیوای دیموکراتیکی و پارێزناو ژیوگەینە نەقشا بیەن مشۆم بە ئا
کارەیە هۆربێزانۍ .
٧- یۆگێرتەی جە دەورو ئایروو نەورۆزی: ئا کەسێ کە ئامادەکاری مەراسمەکاو
نەورۆزی مکەرا با وێشا جە پارچە پارچە کەردەو کۆمەڵگای و ڕادای بە نەیارا
نەورۆزی کە ئامانجشا ئاژاوە نیاینۆن، پارێزنا . مشۆم ئایرو نەورۆزی بۆ بە
ڕەمزوو یۆگێرتەی ، ئازادی و پێوەرە ژیوای .
کۆگاو نەورۆزو هۆرامانی
