خەبەرێ

جە سلێمانییە دیدارو عوسمان هەورامی لواڕاوە

جە سلێمانییە دیدارو عوسمان محەمەد هەورامی بە دروشمو “عوسمان هەورامی بەهرێوی نەمر جە ڕۆشنۋیری کوردییەنە” لواڕاوە و جەماوەرێوی فرە بەشدارێش بیۍٚ.

ڕۊو شەممەی، جە هۆڵو تەواری جە شارو سلێمانیۍٚ دیدارو عوسمان محەمەد هەورامی، مامسا، کەسایەتیی ڕۆشنویر، ئەدیب، و داناو هەرێمو هەورامانی بە دروشمو “عوسمان هەورامی بەهرێوی نەمر جە ڕۆشنۋیری کوردییەنە” ساز کریا.
نە دیدارەکەنە کە مەڵبەندو ڕۆشنۋیری هەورامانی ڕێکوستەبێ، سەرەڕاو بنەماڵەو کۆچکەردەی، ژمارێۋی فرێ جە کەسایەتیۍٚ و ئەدەبدۆستۍٚ و هاموڵاتیۍٚ ئامادۍٚ بێنۍٚ.
دیدارەکە بە دەیەقێو مدرای پەی گیانشادی وڕێزگێرتەی جە عوسمان هەورامی دەسش پنەکەرد و شۆنیشەرە وتارێ بنەماڵەکەیش و مەڵبەندو ڕۆشنۋیری هەورامانی وانێوە. دماتەر چەنڎین کەسایەتیۍٚ سەبارەت بەعوسمان هەورامی و ڕۆڵگێڵنایش جە کایە ئەدەبی و ڕۆشنۋیری و پەروەردەیەنە قسێشان کەردێ. همکات چەنڎین بابەتێ تەرێ ئەدەبیۍٚ جەلاو بەشداربییەکان پێشکەشۍٚ کریێ کە ستایشو کۆچکەردەی جەوێ گێرێنۍٚ.  

هەر جە دیدارەکەنە کتێبو (خەندەی ژینگە)ی کە جەنۋیستەی (عوسمان محەممەد هەورامی)ن و بە همەتو بنەماڵەکەیش چاپ کریان، وزیا ڕووە و ئەشناسیا بە بەشداربییەکان.

یاگێ یادئاوەرین، عوسمان محەمەد هەورامی، کەسایەتی ڕۆشنویر، ئەدیب، مامۆسا و داناو هەرێمو هەورامانی، ساڵەو ٢٠٢٠ی جەشارو سلێمانیۍٚ بەنەوشی کرۆنای کۆچی دماییش کەرد. کۆچکەردە ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ.
کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێ چاپیەنێ.
هاوەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن.

Z