عەبدۆڵرەحمان وسووق ئەژناسیا بە قاسمڵۆ جە ساڵەو ١-١٠-١٣٠٩ وەرانوەر بە ٢٢-١٢-١٩٣٠ جە شاروو ورمێ جە ئەدێ بی .
قاسمڵۆ کورو بەگزاذێ کوردی بە نامێ مەحمەد خان قاسمڵۆ و جە ئەدێوە ئاشووریە کە ژەنەو یەرەمەو تاتەیش بێ ، چەمێش بە دنیە کەوت . جە ورمێ تا کەلاسوو ١٢ەیش تەمامنان و دمایی پەێ دانشگای روەش کەردینە تارانی . جە تاران جە کۆڵێج و ئامریکایی درێژەش بە واناکەیش دان و دمایی پەێ وانای بەرزتەری ڕوەش کەردێنە وەڵاتەکا فەرانسەی و چک و سڵۆواکی . یۆ چا ڕابەرا کوردانەن کە فرەتەرین زوانێش زانێنی . دکتۆر قاسمڵۆ سەڕەراو زوانی ئەدائیش کە کوردی کرمانجی بیەن ، بە زوانەکا فارسی ، تورکی ، عەرەبی ،فەرانسەوەی ، چکی ، سڵۆواکی و ئنگلیسی قسێش کەردێنی .
قسمڵۆ جە ساڵەو ١٣٢٤ وەرەتاوی بیەن بە ئەنداموو جوانا حزب و دموکرات و کوردستان و ئێرانی . ساڵی جە دماو دمایی ئامای بە کۆماروو کوردستانی جە ساڵەو ١٣٢٧ وەرەتاوی پەێ وانای ڕوەش کەردێنە وەڵات و فەرانسەی . جە ١٥-١١-١٣٢٧ یوهەمین کۆگاو وانیەرا کوردی چەنی چن وانیەرا مەڕزنارە . جە ساڵەو ١٣٣١ ی جە سەردەموو دۆکتور مۆسەدێقی گێڵاوە پەێ ئێرانی و چەنی حزب و توودەی نزیکایەتیش وەش کەرد . هەر ئا ساڵە گێڵاوە مەهاباد و نوێنەرایەی حزبو دموکراتیش مەڕزنارە . بە پێشەنگایەتی قاسمڵۆی ڕۆنامەو کوردستانی دەسش بە وەڵا کەردەیۆ کەرد و نزیکەو ٥ شماراش چەنە چاپ بی . جە ساڵەو ١٩٥٧ گێڵاوە پەێ چکی . جە ساڵەوە ۱۳۴۱ – (۱۹۶۲) تاواش بەڵگەنامەو دۆکتراکەیش جە دانشگاو پراگی بە دەس بارۆ . جە ماوەو چن ساڵا دەرسدایش جە دانشگاکا پراگی سەروو ئابووری و سیاسەتی کتێبو «کردو و کردستانیش» بە چاپ یاونا . کە بە چن زوانێ وەڵا کریانەوە .دکتۆر قاسمڵۆ جە ساڵەو ١٩٥٢ زائینی چەنی هێڵن کرووڵیچ ئەژناسیا بە نسرین قاسمڵۆ ژیوای هام بەشش ڕێکوست .
دکتۆر قاسمڵۆ جەکۆنگرەو یەرێ و حزب و دیموکراتی کە جە ساڵەو ١٣٥٠ هەتاوی بەسیا بی بە ئانداموو ڕاوەبەری حزبی وجە ساڵەو ١٣٥٢ هەتاوی وەرانوەر بە ١٩٧٣ پسۆ دەبیر کۆڵوو حزبی هۆرچنیا . قاسمڵۆ یۆ چا ڕابەرا کوردی بێ کە واقع بینانە سیاسەت کەرێ . بە داخەوە دکتۆر قاسمڵۆ جە ساڵەو ٢٢-٤-١٣٦٨ هەتاوی وەرانوەر بە ۱۳ ژوئیهٔ ۱۹۸۹ (۵۸ سال) جە لاو دەسەڵاتدارا رژیموو جمهووری ئیسڵای جە وەڵات و ئۆتریشینسە بە فێڵێ سەروو مێزەو مۆزاکرەیۆ تیرۆر کریا . تەرمەکەو دکتۆر قاسمڵۆی بەمەراسمێ تایبەت جە گۆرستان و پڕ ڵاشێزی جە پاریس ئەسپەردە کریا .نەیارا کوردی هیج وەخت نەتاوانشا بە ئاشتیانە جە پەرسەو کوردی نزیک باوە . پۆچی دائیم کۆشتەی ، ئەشکەنجە و تیرۆرو زینانشا پەنە بریان . یادوو شەهید قاسمڵۆی هەمیشە زینەن و ڕاش درێژەش هەنە . دکتۆر قاسمڵۆ جە دماو وێش بە چنها نویستێ و وتارێ و سۆخەنڕانیەش جیا ئاستێ . هەر پاسە دوێ جە کتێبەکاش بە نامێ ( چڵ ساڵێ کۆشیای پەش ئازادی و کورد و کوردستان ) تا ئاڕۆیج پسۆ سەرچەمەی بەکار مەیا . بە داخەو ئا حزبە کە دکتۆر قاسمڵۆی جە فرەو چەمەڵەکا پارێزنا جە ۱۶ دسامبرو ۲۰۰۶ ی بە بۆنەو دەسەڵاتوازی ڕابەرا ئا حزبەیە بە دوێ بەشێ. هەر پاسە بەشێوە جە نزیکا و ئەندامەکاچشا بە بۆنەو ئی جیا بیەیە بێ هەڵوێست مەنێنێوە .
