پەیاموو ڕابەر ئۆجالانی جە دما دیداروو وێش پێ گەلەکەیما
:
محمد ئوجاڵان جە دما سەرداو وێش جە رۆ ٢-٣-٢٠٢٠ پێ لاو ڕابەر ئۆجەڵانی جە زیناوو ئیمڕاڵی ئاشکراش کەرد کە ڕابەر ئۆجالان فرەتەر سەروو رێکوستەی و بیەی بە هێز قسێش کەردێنێ . محمد ئوجالان باس کەرۆ کە ڕابەر ئۆجالانی واتەن گەر نەبیدێ هێز کەس نیا گرێفتەکاتا چارەسەر کەرۆ . بە تایبەت سەروو تورکیەی باسش چانەیە کەردەن مێزەو تورکیەو سەروو دوێ قاچاوە مدرێنە ، پێ ئانەی مێزەکێ نەگنۆ پەنەوازەن بە کۆشیای بیدێ بە قاچوو یەرەمی .
دماو هەشت ٨ مانگا ڕابەر ئۆجاڵان چەنی چن هەڤاڵا تەری پسۆ براکا عومەر خێری کۆنار و ڤەیسی ئاکتاش سەرداو زینانوو ئیمڕاڵیشا کەرد . باس کەرۆ تا ئا دەیقە کە سەرۆکشا دییەن ، بە شێوە نادرووس بێ ئێحترامیشا پەنە کریان . محمد ئۆجاڵان پێ بەشوو میدیایی پێسە دوا .
نزیکەو دە دەیقا سەروو پەیاوە چەمەڕا بینا تا سەرۆک ئۆما ئۆتاقەو دیداری ، زانابێش کە نەوەشانا و ئاڵاماتم بییەن . پۆچی دەسش چەنی نەذانیوە . بە نگابانەکەیش وات ئەجۆم ساعەت و نیمێ وەختما هەن ، بەلام سەروازەکە هیچش نەوات . جە دەسپەنەکەردەو قسەکاما ، سەرۆک پەرساش پێ چیشی ئامانی و چەنی ؟ منیچ واتم هەر پاسە کە زانی ئایر کەوتەبێ جەنگەڵ و دارسانەکا ئیمڕاڵی . گەلیچ ئی ئایر کەوتەیشە بە ئیدامەو پیڵانگێڵنای زاناو دەنگش بەرز کەردەوە ، پێ ئانەی بزانمێ سلامەتەنی ، منشا ئەرکدار کەردانی کە سەردان کەروو . واتش سەرۆکی واتەن کە ، ئایرەکە سەروو سلامەتی ئاذی و هەڤاڵا خەتەریاتێش نەبیەن . من سلامەتەنا و هیچ گرێفتێ جسمیم نیا .
محمد ئوجالان ماچۆ ، پەنەم وات کە زیاتەر جە سەدەنە ٨٠ پێ ٩٠ گەلەکەیما چارەسەری لاو شممە وە وینۆ .”سەرۆکی وات راسا ، گرفتوو ئێمەن و مشۆم بە وردی سەرشاوە مدرمێ و چارەسەرشا کەرمێ “. ماچۆ سەرۆک سەروو رێکوزیا مەدەنیەکا و دیموکراتیەکا قسێش کەردێ . واتش ئاگادارەنا هەدەپە کۆنگرەو وێش بەستەن ، منیچ واتم بەلێ و فرە کەسێ جە دلێ و بەروو وەڵاتیوە بەشدارێ بێیە . سەرۆک سلامش یاونا هام سەرۆکە تازەکا هەدەپەی و واتش ، مشۆم کۆشیای بەرفراوانتەر کریۆ . گەڵا هەرێمەکەی و هێزە دیموکراتیەکا فرەتەر جە جارانی نزیکێ باوە . ئیسە تورکیە مێزەکێش سەروو دوێ قاچاوە مدرێنەو و سیستمیچ نمەتاوۆ جە کەوتەی رزگارەش کەرۆ . پەنەوازەن شممە کۆشیایتا بەرز کەردێوە و بیدێ بە قاچوو یەرەمی .
پەنەوازەن خزمەتوو گەلی کریۆ :
محمد ئوجالان واتش ، سەرۆکی واتەن مشۆم پێشەنگا حەرەکەتی ئاگاشا وێشا بۆ . فرەتەر خزمەتوو گەلی کەرا . مەبۆ چێروو هیچ نامێوەنە با بە سەرباری پێ سەروو گەلی . هەر پاسە سلامش پێ میدیاکارا کیانا . واتش مشۆم تەڤگەرەکەما ” بەشوو راگەیاندن و میدیای بە هێزتەر کەرۆ ، مشۆم فرەتەر یاری مانگنامەکا ، تەلەفزیۆنەکا و نوسەرا”.
کێ ئەرزشەکا جە بەین بەرۆ ، چەنەش وەش نمەبوو :
سەرۆک جە بەشێ جە پەیامەکەو وێشەنە تەکید سەروو ئانەی کەرۆوە ، ٥٠ سالێن رەنج مدێمێ ، هەر کەس بەهاکا و ئەرزشەکا پێ قازانجوو وێش ، خانەوادەو و کەس و کاریش بە کار بارۆ ، چەنەش وەش نمەبوو ومشۆم حەسابش چەنە وازیۆ .ئێمە چێوێما پێ وێما گەرەک نیا ، قۆڵما بە گەلەکەیما دان ، گەلەکەما رەنجی فرەش کێشتەن ، مەبۆ بە خەسار بڵۆ . مشۆم گەلیچ ئانەی بزانۆ کە حزبەکێ هێزوو چارەسەریشا نیا پەنە ، هێزوو چارەسەری ئینا لا گەلیوە . مشۆم گەل وێش زیاتەر رێک وزۆ . .
گەلا سوریەی و خەباتکارا رۆژئاوای سلامشا یاونوو :
محمد ئوجالان گێلنۆوە و باس کەرۆ کە ڕابەر ئۆجەڵان سالمێ تایبەتش پێ گردوو ئا کەسا کە جە رۆژئاوانە هەرمانە کەرا هەن . بە تایبەت سلامش پێ هۆزە عەرەبەکا کیانا . ماچۆ مشۆم کورد ، ئاسووری ، ئیزئیدی ، عەرەب و تۆرکمەن با بە هێز ، گەر هێزشا بۆ تاوا جە سووریەنە رۆڵشا بۆ . سیاسەت و تورکیەی جە سوریەنە مەڕیان ، روێ چەنی ئامریکای ، روێ چەنی روسیەی ، ئینە راس نیا ، سلامم هەن پێ گردو ئا کەسا جە سوریەنە و رۆژئاوانە پێ ئازادی ڕەنج مذا . سیاسەت و رۆژئاوای راسا . مشۆم با بە هێز تا ئێستراتێژیشا سەرگنۆ . یۆ گێرتەیشا پێ بۆنیاد نیاو سورییەوێ دیموکراتیکی زەروورا . پێ یەکپارچەیی سورییەی مشۆم هێزە دیموکراتیکەکێ یۆی گێرا . جارێ تەر سلام پێ گرد و ئا کەسا کە جە رۆژئاوانە جە رێکوزیاکانە یاگێشا گێرتێنە .
قاچوو یەرەمی بە ڕەنج وەش کریۆ :
سەرۆک باس چانەیە کەرۆ کە گەر بیدێ هێز گرد چێوە چارەسەر کریۆ . محمد ئوجالان ماچۆ ، من پاسەم وات . کە دەوڵەتوو تورکیەی فرە خرابتەر جە جارانی گردوو نەفەسەکاش گێرتێنێ . یاگێ کۆشیای تەنگە بێینەوە . ماچۆ واتش ، گەر شممە بەردەوامی بیدێ و واز ناردێ ، تاودێ گرد چێوە کەردێ و ئی ئاژەیە واردێ . رێکوستەکاتا بە هێز کەردێ . کریۆ ، تۆ من خاس مژناسی ، چەنی جە زارۆڵەیی تا ئارۆ مدڕامان کەروو ، جە وەرانوەروو ئەذێمەوە چەنی مدرانا . چێوە بە نامێ نمەکریۆی نیا . کۆشیای راس ئێمە یاونۆ ئەنجام . گەلوو کوردی جە وەرکەوتوو دلێراسەینە مشۆم بۆ بە هێز تا کێشەکێ چارەسەر کریا . پێ ئانەیە کێشەکێ و گرەفتەکێ چارەسەر کریا مشۆم رەنج دریۆ ، مشۆم خزمەت و گەلی کریۆ .
چێش دەسوو کێنە مێ با کەرۆ و نەمدڕۆ :
محمد ئۆجالان یاوناش کە سەرۆک سلامش پێ هەر چوار پارچەو کوردستانی ( وەرکەوت ، وەرنیشت ، سەر نیشت و پانیشت ) کیانا . هەر پاسە پێ کوردا هەندەرانی سلامش کیانا . هەر یاگە کە کوردێ هەنێ ، سلاموو منشا پەنە یاوندێ . جە باروو تەندرووستیوە فرە خاسەنا . زانوو چەنی ژیوو . وینی چەنینەنا . سەرکەوتی پێ گرد لایە وازوو . جە دمائینە محمد ئۆجالان ماچۆ پەرسام ، جارێ تەر دیدار ئەنجام مدریۆ ؟ ماچۆ جوابش نەذانیوە . بەلام واتش . “گرد چێوە بەسیانۆ کۆشیاو شممەوە ، گەر زیاتەر کۆشیەدێ ، گرد چێوە خاستەر مڵۆ ڕاوە و گفەفتەکێ چارەسەر با . گەر بێ دەنگێ بیدێ و هیچ نەکەردێ ، ون متەی و جەنگیش بەردەوام بعۆ ، گۆشەگیری سەروو منیچ قۆرستەر بۆ ، با هەر کەس جە هەر یاگەنە هەن ، چێشش دەسەنە مێ پێ سەرکەوتەی کەرۆش .
