دەساڵێ چێوەڵتەر جە روێ پسۆ ١٩ پاژەرەژی ( گۆڵان ) شکۆدارا خەتوو ئازادی وەرکەوتوو کوردستانی ئێرانی بە مدرامانوو وێشا و سوور بییەی سەرو ویرو باوریشا بنەڕەتوو جمهووری ئیسڵامی ئێرانیشا ڵەرزنا .
جە تاریخوو دەسەڵات و جمهووری ئیسڵامی زینان سیستموو تەسلیمیەت و ماڕاو ئیرادەو شۆرشگێرا و ئازادیوازا دژ بە رژیمی بێ . تاومێ واچمێ کە رژیم بە سیستماتیک کەردەو شکەنجەی ، تەرس جە قەنارەدای ، تەرس جە دەسدرێژی و شێوەکا تەروو ئەشکەنجەی فرەو ئا کەسا کە روێ وەرانوەرشەنە مدرێبێنی تەسلیمێ وێش کەردێ . بەلام جە رۆ ١٩ پاژەرەژوو ١٣٨٩ هەتاوی شکۆدارا خەتوو ئاپۆچی وەرکەوتوو کوردستانی پسۆ شەهید شیرین عەڵەم هووڵی ، فەرزاد کەمانگەر ، فەرهاد وەکیڵیان ، عەلی حەیدەریان و مهدی ئیسڵامیان بە مدرامانی بێ وێنەشا ، نە ئانە کە تەسلیموو واستەکا رژیمی نەبییە بە مەرگوو وێشا ژیوایە تازەشا بەخشا ئاخێزوو وەرکەوتوو کوردستانی و ئێرانی .
تەسلیم نەبیەی جە وەرانوەروو و رژیمی و بە پێشوازی قەنارە لوای خەتێوە تازێش پێ ئاخێزوو گەلەکەیما و ئازادیوازا دیار کەرد . خەتێ کە واتش تەسلیم بییەی خیانەتا و مدرامان ژیوایا . مدرامانوو هەڤاڵا زینانوو ئەوینوو تارانی جە ١٩ پاژەرەژوو ١٣٨٩ – ٢٠١٠ -٥-٩ پسۆ بوومەڵەرزێوە سیستموو ئەشکەنجە و زینانوو جمهووری ئیسڵامیش ڵەرزناوە . رژیم دماو چن ساڵا هۆلدای پێ تەسلیم کەردەو شکۆدارا پژاکی و ماڕاو ئیرادەیشا بێ هیوا بی . چالاکیە تاریخییەکەو هەڤاڵا پژاکی کە ئلهام گێرتە جە رۆحوو هەزاران شەهیدا ڕاو ئازادی گەلەکەیما پسۆ بریتانەکا ، دۆغانەکا ، زیڵانەکا و ڤیانەکا بێ راسی کۆشیاو حەرەکەتوو ئاپۆچیش جە وەرکەوتوو کوردستانینە نیشانەدا . حەرەکەتێ کە پێ یاوای بە ئازادی هیچ تەسلیمیەتێ قبووڵ نمەکەرۆ و شکۆدارەکێش بە سەربەرزیوە حازرێ گیانفیدائییەنێ .
ویناما کە شکۆدارێ وەرکەوتوو کوردستانی دەرسێ گەورەشا دا بە رژیمی کە تاریخەنە نموونەش کەم بیەن . ئارۆیچ جە دماو دەساڵا بە سەدان زینانییە سیاسییە پسۆ زەینەب جەڵالیان بە رۆحوو هەڤاڵا ١٩ پاژەرەژیوە جە وەرانوەروو سیستموو نائینسانی جمهووری ئیسڵآمی مدرامانش هۆرچنیەن . چا وەختەوە تا ئیسە رۆ دما رۆی جمهووری ئیسڵامی زیاتەر لاواز بییەن و پێ مەنەیۆ وێش جە دەسەڵاتی دەسشدان گرد شێوە جەنایەتێ کە نموونەشا جە تاریخەنە کەم بێیەنێ . بەلام ئانە پێ رژیمی سەبت بی ئانە کە نمەتاوۆ جە قەنارەش دۆ ئازادیا و دماڕۆ . یادوو هەڤاڵا بەرزوو ڕاشا درێژەش بۆ .
