نویستەکا

جمهووری ئیسڵامی دما ڕوەکا دەسەڵاتیش مژمارۆ .

بە بۆنەوە ١١ هەمین دورەو دەسپەنەکەرەو مەجلسوو شۆراو ئیسلامی ئیرانی .
ئانە کە جە دەسەبەنذی ئەندامە دەسنیشانەکا مەجلسسو ١١ وینمێ ، خەتوو دمائینوو خامنەایی کە تەنیا هۆ دەسنیشانکەردەیشا وەفا پێ وەڵایەتی فەقینە ،  پسۆ هێزوو ڕاووەبەری کەشتیەکەو ئێرانی ئەرکدارێ کریەنێ . بە جیاوازتەر جە ٤٠ ساڵی ویوردە پەی یەکەم جاری نزیکەو  ٨٠% جە سەدوو ئا ئەنداما بیەنێ نمایندەو مەجلسێ ، جیای هۆرچنیای واچمێ دەسنیشانێ کریەنێ . هەر پاسە پسۆ مەجلسی وەڵینی وانایۆ پەیاموو خامنەیی و دمایی قسەکا روحانی کە سەروو قسەکاش پێ کرداری کەردەو داواکاریەکا خامنەیی بێ نیشانەشدا کە مەجلس ، مەجلسوو داواکاریەکا خامنەئین و سپاو پاسداران . هەر پاسە قاڵیباف کە جە لاو سەرانوو نیزامی بە لاوازتەرین کەس وینیۆ جە بەشوو ڕاوەبەری پسۆ دما مۆهرەو خامنەیی لەبەیکش پەنە دریان کە پێ سەرۆکوو مەجلسی هۆرچنیۆ . یاگێ باسینە کە هێشتا سەرەراو ئانەی فرەو ئەنداما مەجلسی تائید کریە خەتوو خامنەئینێ بەلام قاڵیباف تەرسەو ئانەیش سەر نیشتێنە کە چاگەیچ باوەریش نەدریۆ پەنە.

:
بەڵام ئانە کە یاگێ سرنجێنە ئانەن کە دەسەڵاتوو جمهووری ئیسلامی کەسێ پاسەش نیا دەسەنە کە جارێ تەر تاو جە دلێنە خەلک و جە بەرەوە دەوڵەتەکاش پەنە خەڵەتنۆ . فرەو ئاکسا کە ساڵانێ یاوەرێ خامنەایی بێنی ، ئیسە دوورێ وزیەنێوە . هەر پاسە جە چوار سالی ویەردە بە سەدان دەسەڵدارێ پڵە بەرزێ بە ملیاردها تمەنێ ئێرانشا جیا ئاستەن . فرەو نەیارا خامنەیی قۆڵبەس کریەنێ کە فرێشا بازنەو یەکەموو دەسەڵاتی بییەنێ . جەنگوو بەشە جیاوازەکا دەسەڵاتی یاوانان بەرزائیی وێش ، هەر جە گۆشەگیر کەردەو کەرووبی کە جەنازەو خۆمەینیش شۆرت تا تیرۆروو هاشمی پسۆ ئەندازیاروو جمهووری ئیسلامی و زینانی کەردەو فرەو نەیارەکا خامنەیی پاسەش کەردەن ئیتر سپاە بە ڕابەری خامنەایی یەکلایانە حۆکموو
وەڵاتی کەرۆ .
رژیم جە ماوەو ساڵی ویەردەینە جە دماو سەهۆرداکا نەورۆزوو ١٣٩٨ کە نزیکەو یەرێ هەزار نەفەرێ کۆشیەو و زەخمی بییە و بە هەزاران کەسێ دەسبەسەر کریە ، دما متمانەو وێش جە لاو خەلکیوە جە دەسدا . واڕای درۆشمەکا خەلکی کە ئامانجشا لوای دەسەڵاتی و مەرگ و نەمان پێ خامنەیی بێ و سۆچناو نمادەکا جمهووری ئیسڵامی ، نیشانەشدا کە رژیم بە تەمامی دیوارەکێش وڕێنێ . ئیتر خەلکی جیای ریفۆرمی ، داوا نەمەنەو دەسەڵاتی بە یەکجاری کەرا . هەر پاسە فرەو ئا کەسا کە جە دەسەڵاتەنە دوورێ وزیەنێ ، تازە بە تازە گەرەکشانە چێروو نامێ فدرالیسمی یا مافوو شاروەندی یاگەپێوە پێ وێشا وەش کەرا .
ئەنجاموو هۆرچنیا ساختەکاو رژیمی و بەشداری نەکەردەو خەلکی چێروو تەماموو فشارەکانە پسۆ رفراندۆمێ شاریاوە بێ پێ رەد کەردەو تەماموو چوارچۆ جمهووری ئیسلامی ئێرانی . هەماهەنگ نەبیەو بەشە جیاوازەکا دەوڵەتی چەنی لایانە چەکدارەکا سەر بە خامنەیی فرەتەر بنەڕەتوو رژیمیش لەرزنان . پەی نموونە سەردانوو پووتینی و ئەسەدی بە بێ ئاگاداری وەزارەتوو بەری پەی ئێرانی یاوا رادەیە کە زەریف دەس جە پۆستەکەیش کێشۆوە ، کە بە حەرەشێ جە وێش و خانەوادەیش پاشگەز بیوە . هەر پاسە وستەیرەو باڵەفڕوو ئوکراینەکەی  بە دەسوو سپاو پاسدارانی و کۆشتە بیەو نزیکەو ٣٠٠ کەسا ، دیپلۆماسی ئێرانیش جە بەروو وەڵاتی ئاردەرە چێروو سفری .

ئیسەیچ جە دماو ئا گرفتا کە بە بۆنەو سیاسەتە غەلەتەکا رژیمی جە ٤٠ ساڵی ویەردەنە جەمێ بێیەنێوە ، رژیم جە ٤ ساڵی ئایەندەنە سەڕەڕاو ئانەی ڕۆ بە رۆ جە بەروو ئێرانینە زەمینگیر بیەن و سپاو قۆدسی شیرازەش بە کۆشتەو قاسم سلڵیمانی و سەدان کادرێ پڵە بەرزێش بە کارێ تێرۆریستییە کەم بیەنەوە ، چەنی چن گرفتە گەورا رووبەرو بۆوە . ١- حەسارە سەروو وەزارەتوو بەروو ئێرانی و کەسایەتیە سیاسەتوانەکێش . ٢- فرە کەردەو فشارە ئابووریەکا بە تایبەت جە بەشوو نەوتێ ٣- بەرز بییەیەیۆ پڵێ گرانی و بێکاری و نەبیەی ئاوێ ٤- جە گردی مۆهمتەر کەمی بوودجەو بەشە خەدەماتیەکا دەوڵەتی و زیاد کەردەو بەشە بوودجەو هێزە چەکدارەکا. پی شێوە رژیم جە بەشوو دیپلۆماسی ، ئابووری و خەدەماتی تووشوو شەپۆڵێ تازا بۆوە . ڵەشوو بیماروو دەسەڵاتی کە دما هەناسەکاش مەنێنێ ئیتر جوابگوو گردوو ئا قەیرانا نمەبۆ کە پێ ماوەێوە تەر وەنەش گرژێ باوە .
ئانەی کە تا ئیسە رژمیش جە دماو سەرهۆرداکا نەورۆز٢٠١٩ -١٣٩٨ پارێزنان ئاژەو نەوەشی کرۆنای بیەن . بە جۆری دەسەڵات بە مۆدیریەتی ئەمنیەتی ئاژەو کرۆنای پەی ماوێ سالێ تەری وێش جە هۆرەترێشقەو دەنگو نارزایەکا پارێزنان . بەڵام هەر پاسە کە واتما ترکیبوو مەجلسوو ١١ نیشانێ ئانەینە کە دەسەڵات بە خرابتەرین گەمەکەرەکا وێش کە بە ساڵانا بایخش نەذەنێ پەنە گرەکشا جەنگوو مۆدرنتەرین هێزەکا جیهانی جە بەشو دیپلۆماسی و ئابووری کەرۆ . هەر پاسە ئا تیمە کە ئیسە فەرمانەو کەشتی ئێرانیش گێرتێنە دەس جە لاو خەلکیوە هیچ شەرعیەتێشا نیا . جا پۆچی هەر یاسا و گورانکاریە بۆ ، خەلکی بە هنوو وێش نمەزانۆ .

هووشیار بیەو ژەنا جە ماوە دە ساڵی ویەردە و بەرزکەردە دەنگوو نارازائەتیشا یۆتەر چا شەپۆڵانە کە جە دماو ئاژەو کرۆنای بنەڕەتوو جمهووری ئیسڵامی تەمام ڵەرزنۆ . جە مەجلسێ ٢٩٠ نەفەری کە نزیکەو ٢٠ کەساش ژەنینێ ، ئاذیچ ئا ژەنا کە دژوو ئازادی و مافەکا ژەنانێ ، قەیرانێ تایبەت جە بەروو قەیرانەکا پسۆ مافوو گەڵا ، مافوو کاریگەرا ، ئابووری و مۆدیریەتی پەی جمهوری ئیسڵامئ ئێرانی تاشۆ . رژیم جە چن سالی ویەردە فرە جارێ بە تاکتیک فرە هەنگامێش پەی خەڵەتناو کۆمەڵگای رێکوستێ ، بەڵام کۆمکۆشتەکەو دمایی گەڵا و ئازادیوازا ئێرانی جە گردوو نەتەوەکا روەی راسی دەسەڵاتیش بە یەکجاری بەرە وستە . جە گردی مۆهمتەر تاواش جە ئێرانەنە بەرێوە مەدەنی تازە جە بەینوو خەلکوو یاگە جیاوازەکا و نەتەوەکا دلێ ئێرانی وەش کەرۆ . هام دەنگی کوردا چەنی گەڵاتەری و بە پێچەوانەوە تەرسێ گەورێش وستێنە دڵوو دەسەڵاتی .

دما جار مشۆم واچمێ کە عەمروو رژیموو جمهووری ئیسڵامی دمائیش ئۆمان و دەسەڵات ڕوە دمائینەکا وێش مژماڕۆ . بە جۆرێ کە دیارا مەجلسوو ١١ یانزەهەمین و جمهووری ئیسڵامی دما مەجلێسەن کە ئی دەسەڵاتە بە وێشۆ وینۆش  .

دەسەو نویسکارا هۆرام .ئینفۆ

Z