بەیاننامەو پڵاتفۆرموو هۆرام-ی سەروو سەرورداکا پانیشتوو کوردستانی :
هام وەخت چەنی سەرورداکا تەروو جیهانی و وەرکەوتوو دڵێراسەی ، کە نیشانێ بە بۆنبەست یاواو سیستموو سەرمایەداری بە پێشەنگایەتی دەوڵەتیا جە چارەسەری گرفتەکا ، جە پانیشتو کوردستانیش سەرهۆردای دیسان دەسش پەنە کەردن . دەسەڵاتوو پانیشتوو کوردستانی کە جە ساڵەو ١٩٩١ی تا ٢٠٢٠ بە مڵیاردها دۆڵارێش جە سروەت و سامانوو گردی دەس کەوتەن ، بە بۆنەو گەندەڵی و فەسادی ئیداری هێشتا نەتاوانش داواکاریە بنەڕەتیەکا پسۆ ئاوێ ، برقی ، هەرمانە و خەدەماتی کۆمەڵایەتی بە یاگێ بارۆ . خرابتەر جە گردی دەسەڵاتدارێ پانیشتی حزبشا جە سەروو گردوو نڕخەکا کۆمەڵگای ، کەرامەتوو ئینسانوو کوردی و حکوومەتیچ بەرز کەردەوە . پۆچی ڕۆ بە رۆ گرفتێ زیاتەر بەرگنا و ژیواو خەلکی قۆرستەر بۆ . ئینە چنەمین جارا کە جە پانیشتەنە سەروردای روە مذۆ بەلام هەر جارە چێروو نامێ جیاوازینە کۆشناشەرە . بە جۆرێ کە داواکاریەکا و رەنجوو خەلکی جیای ئانەی با بە بنەرەتوو یەکسانی و ئازادی ، بەداخەوە با پڵێ پەی سەرکەوتەو چن کەسایەتی و حزبێ .
ئانە کە خەلکی مەبۆ چەنەش غافڵ بۆ ئانەن کە دەسەڵات گرد وەختێ بابەتوو ئابووری پسۆ تەڵەی جە وەرانوەروو خەلکینە بە کار مارۆ . پینەی پەرسەکا تەری ویروو کۆمەڵگای بەرۆوە . دەسەڵاتوو پانیشتی سەرەراو ئانەی کە دەسش گێرتەن سەروو ئابووری کۆمەڵگایرە . نڕخەکا کۆمەڵگایچش فۆتنێنێ . جە گردی خرابتەر پەی مەنەیۆ جە دەسەڵاتی بە خزمەتکەردەی بە سیاستوو داگیرکەرا کوردستانی ، بەشێ فرە جە خاکوو وەڵاتیشا وستەن خزمەتوو داگیرکەرا کوردستانی دژ بە هێزە شۆرشگەرەکا کوردستانی . بە پاوە پەیجۆریە ئابووریەکا دەسەڵتدارا پانیشتی زیاتەر جە ٢١٠ مڵیارد دۆڵارێشا بە بێ ئانەی کە سەرچەمەو سەرف کەردەیش دیار بۆ پەی قازانجوو خانەوادەگی و حزبی بێ سەروو شۆن کەردەن . ئینە جە وەقتێنە کە سەرۆک وەزیرانوو هەرێموو پانیشتی باس جە قەرزار ٢٧ مڵیاردا حکوومەتەکەیش کەرۆ . ئینە دوورا جە راسی و ئامانج تۆقنای و بێ ئیرادە کەردەو خەلکیا.
تەجرۆبەو دەسەڵتداری پانیشتی نیشانەشدا کە ئی جۆرە حۆکمرانیە نە ئانە کە نەبیەن سەرچەمەو خزمەتی بە پێچەوانەوە کۆمەڵگاو کوردیش بەش بەش کەردەن و پەی پارچەکا تەروو کوردستانی بیەن بە کەوا سوور و لەشکەرو داگیرکەرا . یاگێ وێشەنە کە خەلکی جە گردوو یاگەکانە بە ئامانجوو واڕاو سیستموو دەسەڵداری و بەر کەردەو هێزە داگیرکارەکا سەرەراو ئەرەمەرزنایرەو سیستمێ دیموکراتیکی ، کەرامەت بە گەل و نیشتمانی گێڵناوە . ئێمە پسۆ پڵاتفۆرموو هۆرامی باورما ئانەن کە حکوومەتوو هەرێمی نزیکەو سی ساڵان بە سیستماتیک دژ و بە پێچەوانەو داواکاریەکا خەلکیوە جە درێژەدای بە سیاسەتە نادیموکراتیەکاش سوورا و هەنگامە منیۆ . بە تایبەتمەندی ئیمەی هۆرامی سەرەراو گرفتە کۆمەڵایەتی ، ئابووریەکاما چێروو سیاسەتوو خانەوادەو و حزبیوە زوانەکەما رووبە فۆتیای مڵۆ .
پسۆ پڵاتفۆرموو هۆرام-ی بانگەوازیما ئانەن کە خەلکوو پانیشتوو کوردستانی بە تایبەت خەلکوو هەرێموو هەورامانی ئامانجشا واڕای یەکجاری سیستمی بۆ . سیستمێ کە ئیرادەو خەلکی ، شکۆداری ژەنا و سەروەری وەڵاتی بە ئەساس گێرۆ . ئی سیستمە تەنیا بە پەیرەو کەردەو خەتەو یەرەمی کە خەتەو ئیرادەو کۆمەڵگایا بونیاد منڕیۆ . گرفتێ گەلەکەیما جە پانیشتەنە تەنیا مووچە و زەر نیا . ڕوانە بە شێوەی جۆراوجۆر بێ رێزی بە نڕخەکا ئینسانی کوردی کریۆنە . کۆشتەو ژەنا چێروو نامێ نامووسی ، تاڵانی سروەت و سامانی گردی ، فرە بیەو پانتاو داگیرکاری جە لاو دەولەتوو تورکیەی ، نەبیەو ئازادی ، وەلا کەردەیۆ کەڵتووروو داگیرکارا ، پارچە پارچە کەردەو کۆمەڵگا چێروو نامێ دین ، زوان ، چینایەتی و رەگەزیوە ، بە جۆرێ کە ئامیان و یۆگێرتەی نەتەوەیی بە پێوانەکا ئینسانییەوە تێکدریەنێ .
یاگێ وێشەنە کە گرد تاکێ دەنگی نارازی بییەو وێش بەرز کەرۆوە . هەر چن ئی دەسەڵاتە زیاتەر مەنۆوە ، ئابووری ، نڕخە دیموکراتیەکێ کۆمەڵگای ، شناسنوو کوردی ئازاد ، بابەتوو یۆگێرتەی نەتەوەیی و پەرسوو ژەنا زیاتەر تووشوو گرفتا با . مشۆم ئەرکی تاریخی وێما بارمێ یاگێ تا نەوەو دماو ئێمە پسۆ ئێمە ژیوایە پەر جە گیرو گرفتشا نەبۆ . چەنی بۆ جە دماو سی ساڵا ، هێشتا گرفتێ خەلکی نان و ئاو و کارەبا بۆ ؟ چی مشۆم نەوەشێ پەی دەرمانی روە کەرۆ ئیران و تورکیەی ؟ چی هێزێ نەتەوەیی رێک نەوزیان و گرد لایانێ چەکدارێ وێش هەنێش ؟ فرە پەرسێ تەر هەنێ کە راسی حکۆمرانیە پەر جە فەساد و گەندەڵی بەر وزا . چارەسەری گردوو ئی قەیرانا ، سوور بیەیا جە ئەرەمەرزنایرە سیستمێ دیموکراتیک کە گەل پەی وێش بڕیاروو چارەنووسوو وێش دۆ و ئایەندەش دیار کەرۆ .
پڵاتفۆرموو هۆرام-ی بە گرد شێوە پشتیوانی جە داواکاریە ئینسانیەکا ، نەتەوەیی ، فەرهەنگی ، کۆمەڵایەتی و ئابووری خەلەکەیما نیشانە مذەیمێ و تا یاوای بە مافە رەواکاشا جە کۆشیای پەی یەکسانی و ئازادی سوورێ بیمی .
دەسەو ڕاوەبەری پلاتفۆرموو هۆرام-ی
