جە هەڵەبجە پەی کۆچکەردە شاعیر، نویسەر، پەیجورکار، میدیاکار، زوانشناس، پەروەردەکار و مامۆسا (عوسمان محەمەد هەورامی) کۆڕیاد و مەراسیمو پەردەلادای پەیکەرەکەیش ساز کریا و ژمارێوی فرێ کەسایەتی هەڵەبجە و هەورامان و کوردستای ئامادێش بیێ.
:
سەرسەبای ئارۆ دووە شەممەی، جە شارو هەڵەبجەی، بە چەمداری و سەرپەرشتی وەزارەتو ڕۆشنۋیری و لاوانی، ڕاوەبەری ڕۆشنویری هەڵەبجەی کۆڕیاد و مەراسیمو پەردەلادای سەرو پەیکەرەکەیش پەی شاعیر، نویسەر، پەیجورکار، میدیاکار، زوانشناس، پەروەردەکار و مامۆسا (عوسمان موحەمەد ساڵح فەرەج ئەشناسیا بە عوسمان موحەمەد هەورامی) ساز کریا کە ساڵێ ویەردێ کۆچی دماییش کەردەبێ.
کۆڕیاد و مەڕاسیمەکە جە هۆڵ و باخچەو ڕاوەبەری ڕۆشنۋیری هەڵەبجەیەنە ڕێکوزیا و جە میانشەنە بنەماڵەو کۆچکەردەی و ژمارێوی فرێ کەسایەتی هەڵەبجە و هەورامان و کوردستانی ئامادێ بیێ. سەرەتا بە ڕێزگێرتەی جە کۆچکەردەی کۆڕیاڕدەکە دەستش پنەکەرد و دماتەر وتارو بنەماڵەو عوسمان محەمەد هەورامی و چەندین وتارێ و شیعرێ سەبارەت بە کۆچکەردەی پێشکەشێ کریێ و چەندین کەسایەتیێ و لایەنی بە پەیامی نویسیێ و بروسکێ بەشدارێ کۆڕیادەکەی بیێ.
هەرپاسە چەندین خەڵاتێ کە جەلاو چەندین کەسایەتیێ و لایەنێوە ئامادێ کریێ-بێنێ بەخشیێ بە چەندین کەسایەتیێ و بنەماڵەو کۆچکەردەی.
هەرپاسە کتێبچێو بەنامێ ”ئێرو دڵی“ کە جەلاو چەندین کەسایەتیێ و نویسەرێ هەورامانی و کودستانیەوە ئامادە کریابێ و بەشێ جە ژیوای و کار و کۆشای و نامێ بەرهەمەکێ کۆچکەردەی جە وێش مەگێرێ جە کۆڕیادەکەنە وەڵاوکریاوە.
دماتەر جە باغچەو ڕاوەبەریەکەیەنە بە مەڕاسیمێ ئەواوەجەمی پەردە سەرو پەریکەرو کۆچکەردە (عوسمان محەمەد هەورامی) لادریا کە بەسپۆنسەری ڕاوەبەری ڕۆشنۋیری هەڵەبجەی پەیکەرساز (عومەر جەمیل)ی ساز کەردەبێ.
یاگێ یادئاوەرییەن، جە سەرسەبای پەنجشەممەی ڕێککەوتو 2020/10/15ی، جە شارو سلێمانیێ، شاعیر، نویسەر، پەیجورکار، میدیاکار، زوانشناس، پەروەردەکار و مامۆستا (عوسمان موحەمەد ساڵح فەرەج ئەشناسیا بە عوسمان موحەمەد هەورامی) بە فایرۆس و نەوەشی کۆرۆنای گیانش ئەسپارابێ.
هەورامی، ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ. کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێنێ و چاپێ و وەڵاوێ نەکریێنێوە.
هاموەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێشکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن
