مەڵبەندوو ڕۋشنویریی هەورامانی بە هامبەشیی ناوەندوو مەرڎۋخی و مەڵبەندوو ڕۋشنویری و کۋمەڵایەتیی ساداتوو پیرخدروو شاهۋی، دیداروو مەڵا حەسەنوو دزڵێشا سلێمانینە بەرد ڕاوە .
بە ناموونیشانوو مەڵا حەسونوو دزڵیۍ هۋڵۋیۍ عاسمانوو نەمرییوە، مەڵبەندوو ڕۋشنویریی هەورامانی بە هامبەشیی ناوەندوو مەرڎۋخی و مەڵبەندوو ڕۋشنویری و کۋمەڵایەتیی ساداتوو پیرخدروو شاهۋی، دیداروو مەڵا حەسەنوو دزڵێشا سلێمانینە بەرد ڕاوە، کە ڕوێش خواینا و دلێشنە جگە جە واتەو خێرامای و ئامانجوو دیدارەکەی دوۍ پانێڵی جیاوازێنە پەنج ئەوەکٶڵیۍ دەربارەو ژیوای و شیعرەکاو شاعیری و دنیاوینیی شاعیریوە پێشکەشۍ کریێ، دووۍ ئەوکۋڵیارۍ خاوەن دکتۋرۍ زانکۋکاو سلێمانی بێنۍ پانیشتنە و یەرۍ ئەوەکۋڵیارێچ وەرکەوتوو کوردسانیوە ئامێبێنی و باسەکێشا پێشکەشۍ کەردێ.
دمایی وتاروو خێرامای لاو راوبەراو دیدارەکەیۋ،مامۋستا ئەیۋب ڕۋسەم باسێوەنە گرنگیی کەسایەتیی مەڵا حەسەنیش بەر وست کایێنە هەردووە دنیایا زانستوو ئاینشناسی و ئەدەبینە و ئەرەیاوناش، جە راو شیعرەکاشۋ دناوینیی ئەدەبی ئیستاتیکی و زانستییانەو مەڵا حسەنیما پەی بەرگنۋ و ئی دیدارە پا ئامناجە کریان ئینایمۍ تەقەڵانە واوەی دیوانەکەیش جاپ کەرمێوە چونکوم غەڵەتۍ تارێخیۍ و ڕانویسیۍ فرێش چەنەنۍ و تەنانەت شیعرۍ شاعیراو پێسە مەولەوییچ بە نامۍ مەڵا حەسەنیوە وەڵۍ کریێنۍ دیوانەکەشنە.
د.سەباح بەرزنجی نویسەر و مامۋساو زانکۋی ئەوەکۋڵیاێوەنە بەرشوست کە مەڵا حەسەن شاعیریوەن ئینا بەروو زەمانی و مەکانیوە و شیعرەکێش زەمان و مەکان مەشناسا و بەرڎەوام زیندێنۍ و ئینەیچش بە نموونۍ شیعریۍ پەشتڕاس کەرڎۋ دماتەر عادڵ مەحموود پوور نویسەروو وەرکەوتی باسوو پۋتانسیەڵەکاو دلۍ زوانوو شاعیریش کەردو ئەرەیاوناش جە ڕووەو دلێنەیۋ بابەتەشیعرییەکاو شاعیری کۋمەڵایەتی، ئاینی، تەنز، وەشەسیای نیشتمانی… تاد ێنۍ و جە ڕووەو تەشکیچۋ غەزەڵۍ و پارچۍ و مولەمەعۍ و عەرووزیۍ و بڕگەیێێنێ، پێسە دمایی بە تاقوو سەرسەعبوو دیدارەکەی ئاما.
جە تاقوو وێرەگاو دیدارەکەینە تایبەت بە یەرۍ کۋڵیارا بێ، دلێشەنە ڕەخنەکار ڕەوفی مەحموودپوور، باسوو زوانی دەمتەڕوو شاعیریش کەرد و تەنزە و لاقرتیۍ و هەجووۍ و گلەیێش دلۍ شیعرەکاو شاعیرینە جیا کەردۍ و ئەرەیاوناش حەریۋ چی پەرسا هاڵیگاێوەنۍ مەڵا حەسەنی ئەدەبیاتەنە پەڕۍ کەردێنێ، هاموەخت نویسەر و کۋمەڵشناس د. ئیبراهیم حاجی زەڵمی باسوو ئەرکە ئاینی و کۋمەڵایەتییەکاش کەرد دلۍ شێعرەکاو شاعیرینە و واتش شاعیر نەقدوو دینداری و دینداراش کەرڎەن نەک خودوو دینی و چی ڕێوە شاعیر پێسە سۋسیۋلۋگێوەیچ بەرگنۋ کە سەرەمڕ دژوو دیارڎە ناباوەکا نیشانێش پەرسێش نیێنەرە، دمادمایی پانێلەکانە د. فەیرۋز عارفی باسش سەروو سەرڎەمی تارێخیی و کۋمەڵایەتی و سیاسیی شاعیری کەرد و ئەرەیاوناش فرەتەرینوو شیعرەکاش ڕەنگدایۋ دۋخە سیاسی و کولتوورییەکەو گلێرگەو شاعیرێنۍ و باسەکەش پێوەس بە فەلسەفەی و تارێخێوە دۋڵەمەند کەرد.
ئاخروو دیدارەکەیۋ ڕا پەی ئاماەبییا کریاوە، واتەواچی تێروتەسەل کریا و بەشداربیۍ فرۍ جە وانیارا و مامۋسایاو زانکۋی و وانەرا ئامادۍ بێنی و دمایی خەڵات ملوو کۋڵیارەکارە بەش کریا و دماییش ئاما.
