پەیاموو یانەو ژەنا هۆرامانی بە بۆنەو ڕۆ زوانی ئەدایی و ٩ هەمین ساڵڕۆ ئەرەمەڕزنایرەو پڵاتفۆرموو هۆرام-ی
جەرۆ جەھانی زوانی ئەژایی
سڵام پێ ژەنا ھۆرامانی و ھۆرامی زوانی
ژەنو ھۆرامانی یوەمین مامۆساو فێرکەردەو زوانی شیرنی ھۆرامیەنە ، یوەمین پارێزەرو زوانەکێمانە ، پاڵ و گردو هەرمانە کۆمەڵایەتی و یانەداریەکاشەنە ، وێویستانە پێسە جەنگاوەرێوە نادیارێ پارێزگاری جە شۆنەمای بیەیما کەرو . سەروو ڕیزی پێ ئا ئەژایا نامنمێرە کە شانازی بە زوانەکێشاوە کەراو زاوەڵەکاشا بەزوانی شیرنی ھۆرامی پەنە یاونا .
چی ڕوەنە گەرەکمانە واچمێ کێ ویش بەکورد زانۆ ؟ کێ ویش بەدڵسوزو فەرھەنگ و کەلتورو کەڵەپورو ئەدەبیات و کوردی زانو ؟ مشوم خەمو زوانوو ھۆرامیەنە بۆ .پێسە زوانی کە یاگۆ داخێن ، بە پا راپۆرتەکا یونسکۆی زوانی ھۆرامی ئینا دما قۆناغۆ ویشەنە پێ جەبەین شیەی . جەبەین شیەی زوانی ھۆرامی تەنھا پێ ھۆرامی زوانەکا کارەسات نیا . بە پێچەوانەوە هۆرامی پسۆ بنەڕەت و زوانوو کوردی جە بەین شیەیش پێ تەماموو کۆمەڵگەی کوردی دلی چوار مەحاڵۆ کوردستانیو کوردا دنیایچ یاگێ مەتەرسینە . جە وەختێنە کۆنترین تێکست و میلەتەکێما ،کۆنترین قەواڵە تاریخیەکێ کوردی ، جەوەختێنە گاتاکێ زەردەشتی ، هەر پاسە کتێب و سەرئەنجام ویارسان وکاکەییەکا ، ئەدەبیاتی کلاسیک و کوردەواری بە زوانی هۆرامی نویسیەنێ . ئارۆیچ کە زوانەکەما جەبەین بلۆ ، دماجار ئێمە چێشما مەنۆ ؟ مشۆم چیش بە نەوەکا دماڕۆیما واچمی ؟
وەروو ئا تاریخە ڕەنگینەیە کە باسما کەرد ، ھۆرامی زوانوو شانازیا . یاگۆ داخێن کەدوژمن ھەمیشە ھۆڵو جە ڕیخە بەرئاردەی میلەتو کوردی مەدۆنە . خراپتەر جە گردی چی چوار چێوەنە دەسەڵاتی کوردیچ جە پانیشتوو کوردستانی ھامکارو یاردیدەر بیەن . ھەرپۆکەی زوانی رەسەنی ھۆرامیشا کەردەن بە زارو ، زارەکێچ ھەر پێسە زاری وڵاونێنەشا . ھیچ یاگیو دەسەڵاتی کوردییەنە جەباشورو کوردستانیەنە مەوینی زوانی ھۆرامی هەرمانەش پەنە کریۆ . بە بۆنەو ئا سیاسەتە نادیموکراتییەیە رۆحیەتێوە جیاکار دلی گەنجەکامانە و دلی جەوانانە وەش کریان تا جەزوانی ئەیآئیشا دوری گناوە .
چی ڕونە ھاوار کەرمێ و چڕمێ جە ئا کوردە رەسەنا کە ئینێ خەموو نەتەوەیینە ، کە ئینێ خەموو ناسنامەیەنە ، را نەڎا چینەی زیاتەر زوانەکەما جەبین بشۆ . وەرو ئانەیە یەکسانا بە جەبەین شیۆ میللەتێوە رەسەنی پێسە کوردی دلێ میللەتا جیھانیەنە . سەرشۆڕی و شەرمەزاری پێ ئاھۆرامیا کە بە شەرمۆ یان بە مەبەست زوانەکێشا بەکار نمارا . سەرشۆڕی پێ ئاھۆرامیە کاربەدەستا جەباشورو کوردستانیەنە ، کە سەرەڕا ھۆرگیرتەی دمانامەی ھۆرامی ، کەچی نیەنی خەموو و زوانەکێشانەو قبوڵشانە دەسەڵات زوانە کێما بەزار و گولانەتەر جەزاری نامی بەرۆ و بە سیستماتیک هەرمانە پێ فۆتنایش کەرۆ .سڵام پێ ماچۆ زوانەکا ، کاکەیی و یارسانەکا ، زەنگەنەو باجەڵان ، سڵام پێ زازاکا سەرنیشتوو کوردستانی ، شەبەکەکا دەشت و موسڵی یاگەکا تەری کە سەر بە یەک خانەوادەی زوانینمێ . جارێ تەر سەروو نامێ ژەنا هۆرامی ڕۆ زوانی ئەڎایی و نۆهەمین ساڵڕۆ ئەرەمەڕزنایرەو پڵاتفۆرموو هۆرام-ی مۆبارەک بۆ .
یانەو ژەنا هۆرامانی ١٥- فیبروەری ٢٠٢٤
