بەیاننامەو پڵاتفۆرموو هۆرام-ی بە بۆنەو کۆچوو ناوەختو شاعیر و ڕۆشنویر و بە ئاوازەو هۆرامانی وەلی فەتاحی .
:
بەداخەوە هەوال و کۆچوو ناوەختوو شاعیر و ڕۆشنویر و بە ئاوازەو هۆرامانی ، کاک وەلی فەتاحی پسۆ یۆ جە دڵسۆزا و گەلەکەیما خەمسارێش کەردیمی . گەر چێ کۆچوو هەر ئازئیزێ و نزیکێ ناوەشا ، بەلام کۆچوو کەسانێ سەرەراو ناوەش بیەی ، دماو وێشا کەڵینە گەورێ چا بەشەنە کە هەرمانەشا کەردێنە جیا مازا . کۆچوو ڕۆشنویر کاک وەلی فەتاحی یۆ چا کۆچانە کە جە دماو وێش کەڵێنێ گەورێش جە ساراو ئەدەبیات و زوانوو هۆرامی جیا ئاستە .
مامۆستا وەلی ، یۆ جه نویسه‌ره دڵسۆزه‌کانوو هۆرامانی بێ کە جە وتارێ و نویستەکانشەنە فرە جارێ شێوازێوی ڕەخنەگێرانەی گاڵتەئامێزش گێرتەبێنەوەر. کۆچکەردە هاموەخت یۆ جە ئەرەمەرزنەرانو کۆگاو فەرهەنگی ئەدەبی میراز ئەحمەد داودوشی جە ڕەوانسەر و ئەندامو ئه‌نجومه‌ن ئه‌ده‌بی شنه‌و فه‌رهه‌نگوو هه‌ورامانوو پاوه-ی بێ و جە ماوەو تەمەنیشەنە چن بەرهەمێش پێشکەش بە کتێبخانەو هۆرامانی کەردێ .
پسۆ پڵاتفۆرموو هۆرام-ی سەرەراو سەرەوەشی جە خانەوادە و کەس و کاریش ، وێما بە قەرزاروو ڕاو و قەڵەمەکەیش وینمێ . کۆچش هەرمانەو ئیمە و ڕۆشنویرا هۆرامانیش پەێ یاوای بە ئامانجەکاش قۆرستەر کەردەوە . هیواما ئانەن کە رووناکویر ، چاڵاکێ و قەڵەم بەدەسێ هۆرامانی بەرێکوستەو وێشا و بە سیستم کەردەو تێکۆشانیشا شکۆداری پارێزناو زوان و ئەدەبیات و هۆرامی گێرا مڵ . باورما ئانەن کە هەرمانە تاکە کەسیەکا سەرەراو ئانەی کە ئەرکوو ئا کەسا قۆرس کەرۆ ، جە روەداو هەر ئەگەرێ ، کۆسپێ گەورە و کەڵێنی قووڵ پەێ هام ویرەکاش جیا مازۆ . پەنەوازەن پەێ ئانەی رەنجوو دڵسۆزا گەلەکەیما بە خەسار نەڵۆ هۆنەرمەند ، نویسکار ، رۆشنویر و شاعرێ وێشا جە چوارچێوەو کۆگا ئەدەبی و فەرهەنگی و زوانەوانی جەمێ کەراوە و رێکوزا . گەر نەبیمێ بە سیستم ئا رەنج و خەباتە کە جە ساڵانی ویەردە تا ئاڕۆ دریان مەتەرسی فۆتیایش فرەتەر بۆ .
کۆمسیۆنوو فەرهەنگی پڵاتفۆرموو هۆرام-ی
