جە سلێمانییە کەمپەین پەی بەرئاوردەی پەکەکەی جە لیستو تیرۆری ڕێکوزیا

جە سلێمانییە بە بەشداری و پەشتیوانی سەڎان کەسایەتیێ جە پێکئامایە جیا جیاکان، کەمپەین پەی بەرئاوردەی پەکەکەی جە لیستو تیرۆرینە ڕێکوزیا.

ئارۆ شەممە، جە هۆڵو خاکو شارو سلێمانیێ، بە مەڕاسیمێوی گەورە و بە ئامادەبییەی دەزگاکانو یاونەری و میدیاکان، کەمپەین پەی بەرئاوردەی پەکەکەی جە لیستو تیرۆری ڕێکوزیا.
جە مەراسیمەکەنە، سەدان کەسایەتیێ هونەریێ، ڕۆشنویرێ و نویسەرێ و ئەدیبێ، پێشمەرگێ دێرینێ، چالاکوانێ، ڕێکوزیاکێ ژەنا، هاموڵاتیێ و نمایندێ پێکئامایە جیا جیا ئایینەکاکێ پانیشتو کوردستانی بەشدارێش بیێ و پەشتیوانی وێشان پەی کەمپەینەکەینی شانەدا.

بەشداربییەکێ مەراسیمەکەی کە جە پارێزگاکێ هەلەبجە، سلێمانیێ، کەرکوک، هەولێر و دهۆکی و ئیدارەکێ ڕاپەڕینی و گەرمیان-یەوە ئامێبێنۍ، چەنڎین وتارێشان پێشکەشێ کەردێ و جە میانشانە باسشان جە بە ناهەق وستەی پەکەکەی دلێ لیستو تیرۆرەکەی کەرد و واتشان: پەکەکە پارتێوی شۆڕشگێڵەن و ڕڤارێ هونیش پەی ئازادی و چارەسەری مەسەلێ کوردی و پێوەرەژیوای گەلانو هەرێمەکەی دێنە و چەنڎین جارێ دەسش وستەن وەڵێ پەی ئاشتی و چارەسەری.

هەرپاسە جە وتارەکانە، بەشداریکەردەی و پەشتیوانیکەردەی جە کەمپەینەکەی بە ئەرکی نیشتمانیی و نەتەوەیی و ئینسانیی بەنامێ کریا و ئاماژە بە ئانەی دریا؛ نەک پەکەکە بەڵکو، دەوڵەتو تورکی تیرۆرستەن کە سەرجەم دەرفەتەکێ دەوڵەتیش پەی دلێنەبەردەی کوردی و پەکەکەی بەگەڕوستێنێ، بەڵام وەشبەختانە بە ئامانج نەیاوان و شکستش واردەن.

جە کۆتایی مەڕاسیمەکەیەنە و جە چوارچوەو کەمپەینەکەیەنە، دەستکریا بە کۆکەردەیۆ ئیمزایا پەی بەروستەی پەکەکەی جە لیستو تیرۆریەنە و سەرجەم ئامادەبیەکێ بە ئیمزاکانشان پەشتیوانی وێشان پەی کەمپینەکەی نیشانەدا.
کۆمیتەو ئامادەکارو کەمپەینەکەی ئاشکراش کەرد: کەمپەینەکەشان سەرجەم شارێ و شارەکڵێ و ناوچەکێ پانیشتو کوردستانی بگێرۆنەوە و بە هەمان مەبەست ئیمزایێ کۆبکریانێوە.

کۆمیتەکە دەستنیشانش کەرد، ئی کەمپەینە کە جە پانیشت دەستش پنەکەردەن، جە چوارچوەو ئا کەمپەینەیەنە ڕێکوزیان کە (دەسوەڵێوستەی  میاندەوڵەتی پەی کوردی) جە ٣٠ ووڵاتێ جیهانیەنە دەستش پنەکەردەن و ئامانجشەن پەی بەروستەی پەکەکەی جە لیستو تیرۆریەنە ٤ ملیۆنی ئیمزێ کۆبکەرانێوە و تەسلیم بە لایەنە پەیوەندارە جیهانییەکانشان بکەرانێ.