بەیاننامەو پڵاتفۆرموو هۆرام-ی بە بۆنەو ٢٣ هۆمین ساڵەو بڕفانای ڕابەر ئۆجەڵانی .
جە وەختێنە ٢٣ هۆمین ساڵڕۆ بڕفانای ڕابەر ئۆجەڵانی پڕنمێوە کە فرەتەر جە گرد وەختێ کەسایەتی ڕابەر ئۆجەڵانی و پەرسەو کوردی زیاتەر مژناسیۆنە . ٢٣ ساڵێ چێوەڵتەر سیستموو جیهانی ، دەۆڵەتە داگیرکەرەکا کوردستانی و نەیارا پاسەشا نیابێرە کە بە گێرتەو ڕابەر ئۆجەڵانی پەرسەو کوردی دمائیش پەنە مێ و ئاسانتەر تاوا گەلوو کوردی کۆم کۆژ و بە یەیکجاری سڕاشۆ . بەلام ویناما کە مدرامان و ڕابەر ئۆجەڵانی ، هێزوو گریڵای و پەکەکە بێیە بە یاگێ هیواو ئۆمێدی پەێ گەلەکەیما و گردوو ئازادیوازا جیهانی .
رێکوستەو سەدان کۆنیشتێ و سمینارێ هەرێمی و جیهانیە بە زوانە جیاکا جیهانی سەروو تێزەکا ڕابەر ئۆجەڵانی بە تایبەت سەروو بابەت و ژەنا ، ژیوگەی ، وێڕاوەبەری ، دیموکراسی ، ئازادی و یەکسانی و پێوەرەژیوای گەلا . بەشداری هەزاران ئازادیوازێ بە تایبەت ژەنا نەتەوە جیاکا وەڵاتا جە سەفەو گریڵای و یەپەگەی و یەپەژەی جە رۆژئاوا . هەر پاسە ئەرەمەڕزیارەو دەها ناوەندێ پەێ ئەژناساو ویروو ئۆجەڵانی جە وەڵاتا ئەرووپایی و ئامریکای لاتین ڕاسی ویر و فەڵسەفەو ڕابەر ئۆجەڵانی پەێ یاوای ئینسانەکا بە ژیوایە ئازاد نیشانە مذۆ . ئیتر نە ئۆجەڵان ڕابەروو کوردان نە پەکەکە ڕێکوزیایە کوردستانی . جەوەختێنە کە بەهەزاران ئاخێزچییە جە نەتەوە جیاوازەکا جە سەراسەروو جیهانی داواو ئازادی ڕابەر ئاپۆی و بەر ئاوردەو پەکەکەی جە لیست و تیرۆرو ئەرووپای کەرا مشۆم چانەی یاومێنە کە وەخت ، وەخت و ئازادی ڕابەر ئۆجەڵانیا . هەر پاسە پەێ چارەسەری گرفتەکا وەرکەوتوو دڵێراسەی و پەرسەو کوردی ئازادیش جە ئارۆنە پەنەوازەن .
پسۆ پڵاتفۆرموو هۆرام-ی سەرەراو شەرمەزار کەردەو پیڵانەو ١٥ شۆبات و ١٩٩٩ پسۆ روێ سیاوی . بێدەنگی حزبە سیاسیەکا و هەر پاسە پارڵمان و کوردەکا پانیشتوو کوردستانی ڕەخنە کەرمێ و ئی بێدەنگیەیە بە خزمەت بە پرۆگراموو داگیرکەرا کوردستانی زانمێ . سەرەراو ئانەی پسۆ پڵاتفۆرمەکەیما جە ٢٣ هۆمین ساڵرۆ پیڵانەو ١٩٩٩ چەنی ویر و واستەکا ڕابەر ئۆجەڵانی پەیمان تازە کەرمێوە بە گردوو هێزو و توانای پەێ سەروستەو فەڵسەفەو ڕابەر ئۆجەڵانی کە یاوای بە ژیوایە ئازادین درێژە بە کۆشیای وێما دەیمێ .
دماجار داواما جە گرد کوردێ وەڵاتپارێزیا کە بە وانایۆ نویستەکا ڕابەر ئاپۆی و وێ رێکوستەیش پەێ یاوای بە ژیوایە ئازاد و دیموکراتیکی هەنگامە بنیۆ . وەختێ ڕابەرێ پسۆ ئۆجەڵانی ، هێزێ پسۆ گریڵآی و رێکوزیایە پسۆ پەکەکەی هەنێ ، کورد بیەی شانازیا . ڕابەر ئۆجەڵان جە دماو ٢٣ ساڵا بە مدرامان و وێش نیشانەش دا کە ئیرادە جە گرد چەکێ پەێ سەرکەوتەی بە هێزتەرا . هەر پاسە باوەر کرێڵوو کەردەیۆ فرەو ئا بەرانە کە سەرمانە ورزیەنێرە .
دەستەو ڕاوەبەری پڵاتفۆرموو هۆرام-ی
ڕاوەبەری پڵاتفۆرموو هۆرام-ی
١٤-٢-٢٠٢١
