خەبەرێ

یانەو ژەناو ھۆرامانی بەشداری مەڕاسیمو شەھیدا ژیویگەیش کەرد.

جە مەریوان، جە چوارەمین ساڵیادو شەهید بییەیشانە، مەڕاسیمێوی جەماوەری پەی شەھیدانو ژیوگەی شەریف باجوەر و هاۋەڵەکاش ڕێکۋزیا و یانەو ژەناو هۆرامانی و ڕێکوزیاو ۋارانی بەشدارۍٚ مەڕاسیمەکەی بیۍٚ.

جە مەریوان، جە چوارەمین ساڵیادو شەهید بییەیشانە، مەڕاسیمێوی جەماوەری پەی شەھیدانو ژیوگەی شەریف باجوەر و هاۋەڵەکاش ڕێکۋزیا.
جە مەڕاسیمەکەنە جەماوەرێوی فرە و چنڎین ڕێکۋزیۍٚ و سازیۍٚ مەدەنیۍٚ و ژیوگەپارێزیۍٚ بەشڕارێ بیۍٚ ڕێزشان جە هەر چوار شەهیدەکەی گێرت. هەرپاسە یانەو ژەناو ھۆرامانی و ڕێکۋزیاو ۋارانی بە دروشمو (ئەندیشەی سۆز ڕابەرمانە) بەشداری مەراسیمەکێشان کەردو تاجە ۋلی وەفایشان سەرو گڵکو شەھیدەکاوە نیارە.
یانەو ژەنا و ۋاران جە پەیامێوەنە و پەشتیوانی و پەیمان و وەفاو وێشان پەی شەهیداو ژیوگەی و ڕێۋازەکەیشان دووپات کەردەوە و بەڵێنشاندا کە 
درێژە پنەدەرۍٚ  ڕا پیرۆزەکێشان ببانۍٚ و پێسە ئەڎێوۍٚ پاریزەرۍٚ ژیوگەی و ئاوی و خاک و داراستانەکان بێمۍٚ.

یاگۍٚ یادئاوەرین کە جە ڕێککەوتو ٢ خەرمانانو ١٣٩٧ی وەرەتاوی / ٢٤و ئابو ٢٠١٨ی، دارستانەکێ سەڵەس و پێلە-ی سەر بە شارو مەریوانی ئێرشان گێرتەبێ. چالاکوانێ ژیوگەپارێزێ و هاموڵاتیێ مەریوانی شیێ بێنێ ناوچەکە تا ئێرەکەی کۆنترۆڵ بکەرانێ و بکوشانێشەوە. دەرەنجام تا دێرەگاو شەوێ ئێرەکە تاڕادێوی فرە کۆنترۆڵ کریابێ و کوشابێوە. بەڵام سەرسەبای ٣ خەرمانای جاڕێ تەر دارستانەکێ ئێرشان گێرتەبێوە کە گومان کریێ بە ئەنقەست ئێر دریێ بانێوە.  
دیسان پەی کۆنترڵۆکەردەی و ئەوەکوشنای ئێرەکەی، ئەندامێ ئەنجومەنو سەوزو چیای لوێوە ناوچەکەی و درەنجام چوار ژیوگەپارێزێ ئەنجومەنەکەی بە نامەکێ، (شەریف باجوەر، ئومێد کۆنەپۆشی، رەحمەت حەکیمی نیا و محەمەد پژوهی) شەهیدێ بیێ. دمای ئاشکرا بیەی ڤییەرەکەی، سپاو پاسدارانو ڕژێمو ئێرانی بە کوشەتەی ٤ ژیوگەپارێزەکەی تاوانبار کریا، چونکە جە نیمەڕۆ ٣ خەرمانیەنە، دوێ ئەوەتەقایێ جە ناوچەنە ڕووەشان دێبێ و باس جە ئانەیە مەکریێ کە سپای ئەنجامێ دێبانێ و ئامانجش دلێنەبەردی ژیوگەپارێزەکان بییەن.
کردەوەکەو سپای جە مەریوان و وەرکەوتو کوردستانی، توڕەیی و ناڕەزایی خەڵکیش شۆنیەر ئوما و جە ٤و خەرمانانیەنە تەرمێ هەر چوار شەهیدەکەی بە مەراسیمی شکۆدار و سەرهۆردای ئاسا جە مەریوان ئەسپەردێ کریێ و جە کوردستان و چەنڎ شارێ ئێرانی و ئەورووپای پەرسە و سەرەوەشیشان پەی ڕێکوزیا و بەفراوانی هامغەمی پەی خانەوادەکانشان نیشانە دریا.

هەرپاسە جە ٨ پووشپەڕو ١٣٩٩ی وەرتاوی/ ٢٨و حوزەیرانو ٢٠٢٠ی، ٣ چالاکوانێ ژیوگەپارێزێ شارو پاوەی و هەورامانی و ئەندامێ ئەنجومەنو ژیوای بە نامەکێ، (موختار خەندانی، بیلال ئەمینی و یاسین کەریمی)  وەختوە کە سەرقاڵێ ئەوەکوشنای ئێرو دارستاکانو بۆزینە و مەرەخێڵ-ی بێنێ بەشێوازێوی گوماناوی ژیانشان جەدەست دابێ و دیسان ڕژێمو ئێرانی بە پلانمتەرەی پەی شەهیدکەردەیشان تاوانبار کریا. هەر چوون ٤ شەهیدە ژیوگەپارێزەکێ مەریوانی، ٣ شەهیدەکێ پاوەی و هەورامانیچ بە مەراسیمی شکۆدار و سەرهۆردای ئاسا بە واتەی دورشمو “شەهید نەمرەن” تەرمەکێشان جە پاوە و نەوسوڎە ئەسپەردێ کریێ بێنێ.

دمای ئانەیە، کۆمەڵگەو دیمۆکراتیک و ئازادو وەرکەوتو کوردستانی (کۆدار) ٣ خەرمانان-ی ڕۆو شەهیدبیەی ٤ ژیوگەپارێزەکێ مەریوان-یش چوون ڕۆو ژیوگەی دەستنیشان کەردەبێ و داواش کەردەبێ کە ساڵانە جە ئی ڕێککەوتەنە شکۆمەندانە ڕێز جە یاد و ویرەوەی شەهیدانو ژیوگەی بگێریۆنە.
جە ئی چوارچێوەنە، ساڵانە هەم جە مەریوان و هەورامان هەم جە کوردستان و جەبەرو وڵاتی بە ماڕاسیمۍٚ جیاجیۍٚ یادو شەهیدانو ژیوگەی مکریۆنەوە و ڕێز جە ڕەنجی و قوربانییەکانشان مگێریۆنە.

Z