سەرەراو گردو ئا گرفتا کە رژیموو جمهووری ئیسڵامی ئێرانی پێ خەلکیش وەشێ کەردێنێ ، دەسەڵات بە سۆچنای و بڕیەو دارستانەکا نەمدران و بە ورەتەو خاک و کوردەواری بە وەڵاتە عەرەبیەکا خەلیجی سرووشت و هۆرامانیش تێکدان .
جە دماو بەستەیۆ بەنداوەو داریانی سەروو رۆخانەو سیروانیوە ، ساڵانە نزیکەو ٢ ملیارد مۆکەعەبێ ئاوەو هۆرامانی بە بێ پەرسایۆ جە ڕاو ٤٧ کیڵۆمترا تۆنێڵێ وازیۆوە پێ شارەکا دڵێراسەو ئێرانی و هەر پاسە ئا زەمینا کە ئینە دەسوو سپاو پاسدارانیوە .
ئینە جە وەختێوەن کە شار و دەگاکا هەرێمو هۆرامانی هەم پێ ئاوەو واردەی ، هەم کشاوەرزی تووشوو کارساتوو کەمی ئاوێ بێیەنێوە . خرابتەر جە گردی دەسەڵات یەک و نیم بەرابەر زیاتەر جە بەشەکا تەروو ئێرانی جە ئاوێ کە سرووشتییەنە و ملکوو مەنتێقێکەینە جە خەلکی پێ واردەی زەر مسانۆ .
ئارش زەرتەن ڵهۆنی کە نمایندەو ئاو و هەرێموو هۆرماناتین جە پارێزگاو کرماشانی ئانەشە سەر راس کەردەنەوە کە گەر دەۆڵەت ١ جە ٢٠ ئاوەو هۆرامانی گێڵنۆوە پێ کارووباروو کشاوەرزی و واردەی بە هەزاران کەسێ گنا سەروو هەرمانێ و پەنەوازە نیا روە کەرا هەرمانەو کۆڵبەری . ئینە جە وەختێوە کە ساڵانە جە مەرزەکا هۆرامانی نزیکەو ٧٠ کۆڵبەرا بە گۆرۆڵیەو هێزەکا رژیمی گیانشا جە دەس مدا.
