پلاتفۆرموو هۆرام-ی: مامۆستا عوسمان کۆڵەکێوە بێ زوانوو هۆرامیش پارێزنابێ

دەسەو ڕاوەبەری پلاتفۆرموو هۆرام-ی بە بۆنەو کۆچوو ناوەختوو هۆنیەر، نویسکار، زوانشناس و پەیجورکاری ئەدەبی عوسمان محەمەد هەورامی پەیامێوی  سەرەوەشی ئاراستەو خانەوادەو کۆچکەردەی و خەلکوو هۆرامانی کەردەن کە ئینە دەقەکەشەن:

خەڵکوو وەشەویسو هۆرامانی و خانەوادەو کۆچکرکەردەی مامۆسا عوسمان محەمەد هەورامی، پسەو پلاتفۆرموو هۆرام-ی کە ئامانجش پارێزناو زوان، فەرهەنگ و نرخەکاو کۆمەڵگاو هۆرامانیا، وێما بە هامخەمتا مزانمێ و هیوادارێنمێ کە گردما بەدرێژەدای بە ویر و ڕاکێ ماموسا عوسمانی یادش و نامێش پێ هەمیشەی بە زینەیی بازمێوە.
ماموسا عوسمان پسەو کەسایەتییە مانیا جە دنیاو فەرهەنگ، زوان و پەیجورکاری ئەدەبو هۆرامینە یاگێوە تایبەتەش بێ، یۆ جە ئا کۆڵەکا بێ کە دارەڕاو یانەو زوانوو هۆرامیش جە پانیشتوو کوردستانی جە وڕای پارێزنابێ. پۆچی بەکۆچی ناوەختش بە نەوەشی کرۆنای، سەرەراو خەمبار کەردەو کۆم و جەموو هۆنەرمەندا، نویسکارا و هۆنیەرا، ئەرکێ قورسش پێ ئێمە جیا ئاست. یاگێ وێشەنە کە بە درێژەدای ویر و ڕاکێش و رێکوستەو کۆمەڵگاکەیما، بە تایبەت بەرفراوان کەردەو بانوو زوانو هۆرامی و پارێزنایش جە فۆتیای، نامێش و ئاواتەکاش پێ هەمیشەی بە زینەیی بازمێوە .
جارێ تەر پسۆ پلاتفۆرموو هۆرام-ی سەرەوەشی و هامخەمی وێما ئاراستەو گردوو خەڵکوو هۆرامانی و خانەوادەی وەشەویسیشا مەکەرمێ و بە کوشیای پێ ئەرەمەرزنایرەو سیستمێ وێراوەبەری کە فەرهەنگ و زوان و هۆرامی چەنەش فەرمی بۆنە، درێژەدەروو ڕاو و ویرو ماموسا عوسمانەکا بیمێ.

دەسەو ڕاوەبەری پلاتفۆرموو هۆرام-ی