ڕۆ چوارشەممەی ١٦-١٢-٢٠٢٠ جە دانشگاو سۆران-ی بە مەڕاسیمێ سەنتەرو هەورامانناسی کریاوە و جە میانشەنە چەنڎین وتارێ سەبارەت بە هەورامانی پێشکەشێ کریێ و هامکات ژمارێو کەسایەتیێ هەورامیێ خەڵاتێ کریێ.
نیمەڕۆ ئارۆ چوار شەممەی، جە ڤییەرێوی گرنگەنە دانشگاو سۆران-ی جە پارێزگاو هەولێر-ی، بە مەڕاسیمێ (سەنتەرو هەورامانناسی)ش کەردەوە.. پەیبەشداربییەی جە مەڕاسیمەکەی، ژمارێوی فرێ مێمانی جە شارێ و ناوچەکێ کوردستانی و چەنڎین کەسایەتیێ، نویسەرێ، ڕۆشنویرێ و چالاکوانێ هەورامانی، داوەتێ کریێ بێنی و ئامادێش بیێ.
سەرەتا وتارو سەرۆکو دانشگاو سۆرانی پڕۆفیسۆر دکتۆر موسلح موستەفا پێشکەش کریا و جە میانشەنە سەرەڕاو خێرئاوردەی مێمانەکان، باسش جە گرنگی ئەوەکەردەی سەنتەرەکەی و فەرهەنگ، زوان، ئەدەبیات و دێرینە و تایبەندمەندی هەرێمو هەورامانی کەرد.
دماتەر نامبریا سەبارەت بە سنتەرەکەی ئی زانیاریێشە ئاشکرێ کەردێ:
سەنتەرو هۆرامانناسی / دانشگاو سۆرانی
[پڕۆپۆزەڵ و بەرنامەو کاری]
بەشێ جە وەرینەی:
:
هۆرامان هەمیشە مەڵبەندێوی گرنگی کولتووریی بەرهەمئاوردەی هزر و ویری ئەوەکریای، زمان و ئەدەبی باڵا، هونەرو بیناسازیی وێگونجنەر چەنی سروشتی، کەڵچەرو ژەندۆستی و ژیوگەدۆستی بییەن و هەن. بە درێژایی هەزاران ساڵان مەتاوانش نەک هەر بمانۆنەوە، بەڵکو گەشەیچ بکەرۆنە و ئەڵتەرناتیڤی نۊ پێشکەش بکەرۆن. تەنانەت بە ئا کەمە پەیجوریا کە سەباەت بە هەورامانی مەکریێنێ، ئاڕاستییە ئاشکرا بییەن کە ئاسایشو کۆمەڵایەتیی کۆمەڵگەو هۆرامانی، تەندرووستی و تەمەندرێژیی ئەرەنیشتەکانش، پتەویی و بەهێزیی تەڵان و تەلارەکانش، پەسەندکرایی حیکمەتو دێرینەیش پەی ژیوای و سەرجەم دونیاوینییەکەیش پەی سەرجەم بوارەکێ، هەر جە کشتوکاڵ و ئاودارای تا فەرمانڕەوایی و دەستەڵاتدارێتی سیاسیی، گردشان شایستێ پەرەپنەدای و چەمونەکەردەیەنێ و سەنتەرو هۆرامانناسی گەرەکشەن تا دەست پەی ئی خەزێنە مەزنەیە ببەرۆنە و چەنی گرد لایێ بەشش بکەرۆن.
نامێ: سەنتەرو هۆرامانناسی
دروشم: پارێزنای ویەردەی، بەهێزکەردەی ئایندەی.
لۆگۆ: دماتەر جەلاو لیزنێوی شارەزایەوە دیاری بکریۆن.
ئەشناسە: سەنتەرو هۆرامانناسی ناوەندێوی ئەکادیمییەن. جە بواری ئیدارییەوە سەر بە سەرۆکایەتیی زانکۆو سۆران-یەن. جە چوارچوەو پیمانە ئەکادیمییەکانە کار پەی ئەشناسای زیاتەرو ڕەهەندە جیا جیاکێ ژیار و شارستانی هەورمانی مەکەرۆن.
مێژوو ئەرەمەرزنای: سەنتەرو هۆرامانناسی، بە پەشتبەستەی بە بڕیارو زانکۆیی ژمارە —–و ساڵەو ٢٠٢٠ی مەرزیانەرە.
ئامانج: سەنتەرو هۆرامانناسی چوون ناوەندێوی ئەکادیمیی سەر بە زانکۆو سۆرانی کار مەکەرۆن پەی:
یەکەم: کۆکەردەی و پارێزنای سامانو کولتووریی ڕەهەندە جیاوازەکێ ژیار و شارستانی هۆرامان.
دووەم: بە پەشتبەستەی بە زانستی و تەکنۆلۆژیای نوی، پەیجۆری بوراەکێ زوان، ئەدەب، مێژوو، کۆمەڵگا، هونەر، حیکمەتو ژیوای و ژیوگەو هۆرامان و تەمامی ڕەهەندە جیاوازەکێ ژیار و شارستانی هۆرامانی بکەرۆنە.
یەرەم: ئەشناسای و هامبەشیکەردەی ماریفەتی بەدەستئاما جە پەیجۆرە زانستیەکان پەی پێشکەشکەردەی ئەڵتەرناتیڤی شایسەەی پەی کێشەکانو سەردەمی بە ئامانجو بنیاتنیای ئایندەی بەهێزی.
چوارەم: لە سۆنگەو بەوەڕبییەی بە ئانەیە کە جە دلێ زوانیەنە مشیۆم شۆنەو ژیاریەرە بگێڵیۆنە، سەنتەرو هەوراماناناسی گرنگی بە نویستەی، هۆرگێڵنای و وانای بە هۆرامی بدۆنە..
پێکئامای ڕێکوزیایی سەنتەری:
سەنتەرو هۆرامانناسی جە ئی بەشانە پێکمەیۆن:
یەکەم: ڕاوەبەری سەنتەری.
دووەم: هۆبەو پەیجۆری و کاروبارو ئەکادیمی.
یەرەم: هۆبەو کۆکەردەی، پارێزنای و پەرەپەنەدای.
چوارەم: هۆبەو کاروبارو ئەرەیاونای (میدیا).
ستافو سەنتەرەکەی:
سەنتەرو هۆرامانشناسی ئەنجوومەنێوی پەنج کەسیی مەبریۆنەڕاوە.
دەستەو ئەرەمەرزنەرەکان:
پ.ی. د. هەژار ڕەحیمی
د. فازڵ حمە سعید
م. هۆشەنگ دارا
ئیمان عەبدوڵا عومەر
هەر پاسە جە د ای وتارەکێشنە پڕۆفیسۆر دۆتۆر موسلی موستەفا سەرۆکو دانشگاو سۆرانی تەمامی دەستنویسە ئەلکترۆنیەکێ وێش و بەشێ جە کێتێبەکێ کتێبخانەکەیش پێشکەش بە سەنتەرو هەورامانناسی کەردێ.
دماتەر چەنڎین وتارێ تەرێ پێشکەشێ کریێ و سەرەڕاو سپاسگوزاری و دەستوەشی جە ئەوەکەردەی سەنتەرو هەورامانناسی و گرنگی سەنتەرەکەی، گرد لایێ وازیارێ بێنێ جە ڕاو سەنتەرەکەیەوە خزمەت بە فەرهەنگ، زوان، ئەدەبیات و دێرینە و تایبەندمەندی هەرێمو هەورامانی بکریۆنە و هاندەریچ بۆنە تا زانکوێ و پەیمانگاکاکێ تەرێ کوردستانی زیاتەر گرنگی بە هەورامانی بڎانێ.
شۆنیەرە ژمارێو کەسایەتیێ کە پەی هەورامانی مانیاینێ و ڕۆڵ و یاگەدەستشان جە پارێزنای فەرهەنگ و زوان و ئەدەبی هەورامییەنە دیارەن چوون: جەلیل عەبباسی، نامق هەورامی، جەمال بێدار، هەراڵە شەوکەت لهۆنی، دکتۆر ناجح گوڵپی، جەلاو زانکۆکەیەوە خەڵات کریێ.
یاگێ ئاماژەیەنە، دمای نزیک بە سی ساڵێ جە دەسەڵات و ڕاوەبەری کوردی جە پانیشتو کوردستانی، ئینە یەکەم جارەن سەنتەرێوی هەورامانناسی بکریۆنەوە. هەورامییەکێ سەرەڕاو پێشوازی گەرمی و سپاسگوزاری جە زانکۆو سۆرانی پەی ئەوەکەردەی سەنتەرەکەی، وازیارێنێ نەک هەر جە زانکۆو سۆرانی، بەڵکو جە سەرجەم دانشگاکا تەرێ کوردستانیەنە سەنتەرێ و ناوەندێ هامشێوێ بکریانێوە و حکومەت بە گردی و وەزارەتەکێ پەروەردەی و وانای باڵای زیاتەر گرنگی بە هەورامانناسی و زوان و فەرهەنگ و ئەدەبیاتو هەورامی بڎانێ.
