پڵاتفۆرموو هۆرام-ی بە پاو ئاژەو ئاڕۆ کۆوردستانی داوا جە گرد کەس و لایانێ کەرۆ جە وەرانوەروو دسدرێژی تورکیەی پەێ سەروو پانیشت و کوردستانی بێ دەنگ نەبۆ.
:
جە دەقوو بەیاننامەکەو پڵاتفۆرموو هۆرام-ی ئامان :
خۆلکوو وەشەویس و هۆرامانی ، هەر پاسە کە ئاگادارێندێ سەروو فشارو داگیرکارا کوردستانی جەنگێوە یانە وێرانکەر یەخێ وەڵاتیش گێرتێنە . ئی جەنگە ڕۆ بە ڕۆ گڕەش بە تینتەرە بۆ . یاگێ وێشەنە کە گرد کەس و لایانێ بە پاو ئەرک و وەڵاتپارێزی و وەشەویسی وێش پەێ وەڵاتی هەنگامە پەێ مدرناو ئی جەنگەیە بنیۆ . هەر چن کە بە ١٠٠ ساڵەو رێککەوتنامەو ڵۆزانی جە ساڵەو ٢٠٢٣ نزیکێ بیمێوە فشارەکا دەۆڵەتوو تورکیەی پەێ سەروو پانیشت و کوردستانی و دەستکەوتەکاش فرەتەرێ با .
نزیکەو دوێ مانگان کە دەۆڵەت و تورکیەی چێروو نامێ جەنگ چەنی گریڵاکا پەکەکەی روبەرێ فرە جە پانیشتو کوردستانیش گێرتەنەرە . نزیکەو ٣٠ سی هەزار سەروازێش جە ٧٠ بارەگایانە مەڕزنەنێرە . تا مێ فرەتەر وێش بە مەرزەکا سەردەموو عۆسمانی و سەفەوی نزیک کەرۆوە . ئانە راسییەوێن کە مشۆم گرد کەس و لایانێ بزاناش . ئامانجو تورکیەی تەنیا پەکەکە نیا . ئامانجوو تورکیەی جە بەین بەردەو دەستکەوتوو کوردان بە گردی . بە داخەو ئاڕۆ حکوومەت و هەرێم و کوردستانی و عێراقی جە وەرانوەروو دەسدرێژیەکا تورکیەی بێ دەنگێنێ . ئی بێ دەنگیە جە یاگێ وێشەنە چێوە خاس نیا و یاگێ گۆمانێنێ . بەینو لایانە کوردیەکا ناتەباهی هەن .
پسۆ پڵاتفۆرموو هۆرام-ی باورما ئانەن و هەرمانەیچش پەێ کەرمێ . مشۆم گرد لایە جە وەرانوەروو ئی دەسدرێژیاوە وێشا بە وەرەپەرس وینا . ئامانج تەنیا پەکەکە و گریڵا نیا . گەر ناکۆکیە بەین و لایانەکاچەنە هەن ، گۆفتمان خاستەرین هۆرچنیان پەێ جە یۆترینی یاواینە . داگیرکارا کوردستانی رێکێ کەوتێنێ کە جە هەر یاگە کیانێ پەێ کوردا رێکوزیابۆ تێکشدا . سەروو ئی ئەساسەیە داواما جە گرد کەس و لایانێن پەێ مدڕناو جەنگ و دلێ کوردا جە بەین و وێشا هەنگامێ بنیا و هەر چێوە کە گرژی بەین و لایانەکا فرەتەر کەرۆ چەنەش دووری گێرا .
هەر پاسە داواما جە رووناکویرا ، چالاکا مەدەنی ، ژەنا ، نویسکارا و چینە جیاوازەکا کۆمەڵگاین بە رێکوستەو کەمپەینێ چێروو نامێ ( بەلێ پەێ یۆگێرتەی نا پەێ داگیرکاری ) دەنگوو وێشا وزا پاڵوو دەنگیما . باورما ئانەن کە جە ئەگەرو گەورە بیەو جەنگ و کوردا جە بەینو وێشانە تەنیا داگیرکارا کوردستانی قازانج کەرا . چی وەختەنە کە وەرکەوتوو دڵێراسەی جارێ تەر نەخشەی تازەش پەێ کێشاوە گەر کوردێ یۆی نەگێرا گرد لایە زەرەرمەند با و ڵۆزانێ تەر بالێ کێشۆ سەروو کورد و کوردستانیرە . بە جۆرێ نە تەنیا نیشتمانەکەما ، فۆتیای یەکجاری زوان ، فەرهەنگ و کەڵتووریچما گێرۆوە . پۆچی بەیدێ کە گردما پێوەرە کەمپەینێ سەراسەری چێروو نامێ ( بەلێ پەێ یۆگێرتەی نا پەێ داگیرکاری ) پەێ نزیک کەردەو لایانە کوردەکا رێکوزمێ.
ڕاوەبەری پڵاتفۆرموو هۆرام-ی
٢٧-٦-٢٠٢١
