بەیاننامەو پڵاتفۆرموو هۆرام-ی بە بۆنەو رۆ زوانی ئەدایی و ئەرەمەڕزنایرەو پڵاتفۆرموو هۆرام-ی .
هەر پاسە کە زانمێ خەڵکێ زینەن کە زوانەکەش زینە بۆ . زوان پسۆ گیاندارێ مشۆم خزمەت کریۆ . پەێ ئینسانەکا زوان نە تەنیا ئامرازوو پێوەندین ، چانەیە گرنگتەر ئەرمانەروو فەرهەنگوو خەڵکانێوەن کە قسێش پەنە کەرا . زوان بەشێوە گرنگ جە وێبیەی(هویت) مرۆڤین و دنیاو ئادی نیشانە مدۆ و شیش کەرۆوە. نەوانای بە زوانی ئەدایی زینان کەردەو کەسایەتی ئینسانەکان . پۆچی فرەو زوان شناسەکا زوانی ئەدایی بە ئامیان و کەسایەتی زارۆڵەی زانا . جە ماوەو دە ساڵی ویەردە وەشبەختانە هەنگامێ گەورێ و هارمانێ جۆراوجۆرێ جە لاو هۆرامی زواناوە پەێ پارێزناو ریشەو زوانوو کوردی – هۆرامی هۆرگیریەنێ و کریەنێ .
جە لایە تەر تاپۆ کەردەو فەرهەنگوو هۆرامانی جە لاو یۆنسکۆی جە ساڵەو ٢٠٢١ هەنگامێ تەرە بێ پەێ ئانەیە کە جە وەرمەنە چڵاکیەمێرە . بڕیارەکەو یۆنسکۆی بەر وستەو ئا ڕاسینە کە زوان و فەرهەنگوو هۆرامانی سەڕەڕاو ئانەیە کە کۆنا ، بەشێمۆهما جە گەنجینەو فەرهەنگوو جیهانی . سەروو ئا ئەساسەیە بڕیارەکێ یۆنسکۆی تاوۆ بۆ بە بنەڕەت و ئەرەمەرزنارەو سیستموو وانای پەێ خەڵکوو هۆرامانی . ئاژەو ئاڕۆ جیهانی ئنە بە خێرایی واڕیۆ کە غفڵەتێ گوڵانە سەبەبا پەی فۆتیای نەتەوێوە یا زوانێ . هۆرامیچ یۆ چا زوانانە کە تەرسەو فۆتیای و نەمەنەیش فرێنە .
پڵاتفۆرموو هۆرام-ی جە رۆ زوانی ئەدایی و هەر پاسە ئششەمین شاڵڕۆ ئەمەرزنایرەو پڵاتفۆرموو هۆرام-ی جە وەرانوەروو کەم کارەیا وێش پەێ پارێزناو زوانی ئەدایی و ئەرەمەرزنایرە سیستمێ وێڕاوەبەر پەێ هۆرامانی ڕەخنەدای وێش مذۆ . ئینە پا مانانە کە ئێمە تاوێنمێ هەرمانێ گەورەتەرێ و خاستەرێ پەێ فەرهەنگ و زوانەکەیما جە ماوەو چن ساڵی ویەردێنە ئەنجام دەیمێ . بەلام کەمتەر خەمیما کەرد . هەر پاسە کە ئاماژەما پەنە کەرد ئاژەو ئاڕۆ جیهانی جە گرد بەشەکانە بە خێرایی ئینا واڕیاینە . داواکاری خەلکوو هۆرامانیچ جە ویر و هەرمانەکاشارە نیشانێ ئانەینە کە هووشیاریە گردی پەێ مەرزنیارەو سیستمێ ئینا بارەنە . .
جە ششەمین ساڵرۆ ئەرەمەرزنایرەو هۆرام-ی تا یاوای بە ئامانجە بنەڕەتیەکاما کۆشیای و ئەرک گێرتەیما پەێ چارەسەر کەردەو گرفتەکاما فرەتەر کەرمێ و باوریچما ئانەن کە بەرز بیەیەو هووشیاری گردی و فرە بیەو مەیدان و هەرمانە فەرهەنگیەکا ئانەی وازۆ کە پەێ چارەسەری فرەو گرفتەکاما تەنیا ڕاما ئانینە کە بیمێ بە سیستم . ئاژەو زوانی ، ئازادی و ژیوایە گەڵمیر ئانەی وازۆ کە بە ئامانجوو خزمەت بە بەشێ جە شناسوو مرۆڤایەتی و سرووشتی گرد ڕوێما ڕۆ پارێزناو زوانی ئەدایی بۆ .
کۆمسیونوو فەرهەنگی پڵاتفۆرموو هۆرام-ی
