جە نۆسوڎە تەقای گازی، وڕای یانێوی ٣ نهۆمی و گیان جەدەستدای ٢ کەساش ونەکەوتەوە و پەیجۆری جە ویەرەکەی بەردەوامەن.
سەعات ٠٨:٣٠ دەیەقێ سەرسەبای پەنجشەممەی، نەوسوڎیەکێ
بەدەنگو ئەوەتەقایێوی فرە گەورەی چڵاکیێرە. شۆنیشەرە بەرکەوت جە یانێوی ٣
نهۆمی شارەکەیەنە گاز (غاز) تەشەنەش کەردەن.
تەشەنەکەردەکەی ئەوەتەقایێ گەورە و شۆنیشەرە ئەرەوڕای یانەکێش ونەکەوتەوە.
نەوسوڎیەکێ و تیمەکێ فریاگوزاری دەمودەست یاوێ یاگێ ویەرەکەی و هەر زوو
بەرکەوت کە تەقاکەی کارەساتی گەورەش شۆنیەرە ئامان و خانەوادێوی ٨ کەسی
زیانمەندێ بیێنێ و بیێنێ چێرو یانە وڕاکەیەوە.
جەدمای هەوڵ و تەقالای فرەی، ٦ کەسێشان بەزینڎەیی بەڵام بە زامداری
بەرئاوریێوە و بەداخەوە دوێ تەرێشان کە ئەڎایێوە و کوڕە زارۆڵەکەش بێنێ بە
گیان جەدەستدای تەرمەکێشان بەرئاوریێوە. ئانێچە ئانڎەی تەر خەڵکو نەوسوڎێ و
هەوراماناتیش غەمبارێ کەردێ.
یۆ جە زامدارەکان کە زامەکەش سەخت بێ بە چەرخباڵ (هەلیکۆپتەر) ڕەوانەو چارەسەگاو تاڵەقانی کرماشانی کریا و زامدارەکێ تەرێ بریێ پەی چارەسەرگاو قودسی جە شارو پاوەی.
سەبارەت بە هۆکارو تەشەنەکەردەی گازەگەی و ئەوەتەقاکەی پەیجۆر و شۆنیەرەلوای دەستش پنەکەردەن و خەڵکو نەوسوڎێو هەورامانی چەمەڕێنێ جە زووتەرین وەختەنە ئەنجامو پەیجۆری و شۆنیەرەلوایەکەی وەڵاوبکریۆنەوە و لایەنی کەمتەرخەم و خەتابار دەستنیشان و دادگایی بکریۆنە. هامکات نەوسوڎیەکێ وازیارێنێ قوربانیەکێ و کەوسوکارشان قەرەبووێ بکریانێوە و کۆمەکی ماڵی خێرا بکریانێ.
شارو نەوسوڎێ نزیک بە ١٠ هەزارێ ئەرەنیشتێش هەنێ و سەر بەشارستانو پاوەیەن و شارەکە چەنڎ مانگێوەن لولەکێشی گازیش پەنە یاوان.
