پەیاموو سەرەوەشی پڵاتفۆرموو هۆرام-ی بە بۆنەو شەهید بیەو پارێزوانا ژیوگەو هۆرامانی
خانەوادە و کەس و کارە سەربەرزەکا ، کاک مۆختارخەندانی ، یاسین کەریمی و بیڵال ئەمینی
هەواڵ و گیان جە دەسداو ئازئیزا گەل و نیشتمانی ، وەڵاتپارێزا و ژیوگەدۆسا وەڵاتی جە ناخوو دڵیماوە خەمسارێ و دڵگرانێش کەردیمێ . جە دەسداو ئی وەشەویسا بە تایبەت پسۆ پارێزەرا ژیوگەو هۆرامانی و وەڵاتی خەسارێ گەورەن پەی خەلکوو هۆرامانی و کوردستانی . هەرچی واچمێ و بنویسمێ نمەتاومێ باسوو فیداکاری ، ئینسانیەت و وەڵاتپارێزی ئی وەشەویسا کەرمێ . راسا ، ئی ئازئیزێ جە خانەوادەکا شمەنە گەورێ بیە ، بەڵام ئاڕۆ بیە بە رۆڵەو گرد خانەوادێوە نیشتمان پەروەری ، ئارۆ بیە بە ئۆڵگوو گرد ئینسانە وەڵاتپارێزی ، ئاڕۆ بیە بە ڕێوە پەی یاوای بە ژیوایە ئازاد و نیستمانێ سۆزی .
ئیمە پسۆ پڵاتفۆرموو هۆرام-ی سەرەراو سەرەوەشی جە شمەی ئازئیزا ، بە شانازیەوە تەماشەو زەحمەتا شمە پەی پەروەردە و پەنەیاونای ئی ئینسانە بەرزا کەرمێ . کەردەوەو ئی شەهیدا نیشانێ پاکی و وەڵاتپارێزی ئا یاگێ نیشانە مدۆ کە چەنەش گەورێ بیەنێ . خەمتا بە خەموو وێما وینمێ و چەنی ئازارەکاتا ژیومێ . دڵنیەنمێ کە گەلەکەما تا ژیوای مەنەبۆ نامێ ئی وەشەوەیسا جە دڵشانە مازاوۆ . ئیمەیچ پسۆ پڵاتفۆرموو هۆرام-ی پەیمانما تازە کەرمێوە کە پەی ئاسوودەیی رۆحوو ئا شەهیدا بە ئاوەدان کەردەیۆ وەڵاتی و پارێزنای ژیوگەی رۆحشا پەی هەمیشەی سۆز مازمێوە . جە گەلەکەیما بە تایبەت خەلکوو هۆرامانی داواکارێنمێ کە بە درێژەداو ڕاو ئی ئازئیزا ئاواتوو نەیارا ژیوگەی و ئاشتی بنیا چاڵی .
دەسەو ڕاوەبەری پڵاتفۆرموو هۆرام-ی
٩ کۆپرو ١٣٩٩ هەتاوی
