بە پاو هەواڵێ کە جە پەڵیانەو کۆگاو ژیوگە پارێزی ژیوای یاوان دەسما بە داخەوە یەرێ ژیوگەپارێزێ هەرێموو هۆرامانی بە نامەکا (مۆختار خەندانی نۆسوودی ) جە ئەرەمەرزنێنەرا کۆگاو ژیوای ، (یاسین کەریمی شمشێری ) ئەنداموو کۆگاکەی و وەڵاتپارێز (بەڵال ئەمینی ئێناخی ) جە وەختوو کوشنایۆ ئایرە کە کۆتەبێ مەنتێقەو بۆزین و مەڕەخڵ گیانشا بەخت کریا . بە پاو ئا بەڵگا کە کەوتەن دەسوو میدیاکا شەهید بیەو ئی یەرە وەڵاتپارێزەیە دەسێ تایبەت پەشتیشەوە بیەن .
جە لایەتەر بە بۆنەو ئانەی کەشوو بۆزین و مەڕەخڵی یاگێ سەختێنێ ، مشۆم جە ڕاو کۆپتەریوە ئایرەکەش کۆشیەوە ، بە داخەوە بە بۆنەو نەبیەو هیچ ئیمکاناتێ جە مەنتێقەکەنە ، دلسۆزا وەڵاتی بە بێ هیچ ئیمکاناتێ تا دما هەناسە پەی کوشنایۆ ئایری جەنگیە و چی ڕێنە گیانشا بەخت بی . مخابن چن ساڵێن کە وەرکەوتوو کوردستانی بە شێوە بەرفراوان و گۆماناوی گرد ساڵێ جەنگەلەکا زاگرۆسی ئایرشا چەنە گنۆوە و بە دەها کەسێ تا ئیسە زامدارێ بێیەنێ . دوێ ساڵێ چێوەڵتەر جە ٣ -٦-١٣٩٨ جە مەریوانەنە چوار کەسێ بە نامەکا شەریف باجوەر ، ئۆمێد کۆنەپۆشی ، محمد پەژووهی و رەحمت حەکیمی‌نیا سەر بە کۆگا ژیوگە پارێزوو چیای جە وەختوو کۆسنایۆ ئایرینە ، بە داخەوە گینشا بەختکەرد .
