کۆمسیۆنوو ژەنا هۆرامانی بە بۆنەو گیان جە دەسداو شڵێر ڕەسووڵی ( قوربانی دەسدرێژی )پشتیوانی وێش پەێ داواکاری ژەنا مەریوانی نیشانە مذۆ .
خەلکوو و وەشەویس و مەریوانی و بە تایبەت چینوو ژەنا ، گیان جە دەسداو خاتوو شڵێر ڕەسووڵی کە بە شێوە تراژدی بیە بە قوربانی مسەلەێ شەرەفی ، دڵ و هەست و گرد ئینسانێ بە ویجدانیش ئازار دا . جە فیپسگایە پیا ساڵار ڕوانە بە شێوە جۆراو جۆرەکا دەسدرێژی ، بە سووک وینای و بێ حۆرمەتی وەرانوەروو ژەناوە ڕوە مذۆ . فرەو ژەنا بە بۆنەو فەرهەنگ و پیا ساڵار و دەسەڵاتی مڵهۆر جە وەرانوەروو ئا کردەوە قیزوناوە بێ دەنگی هۆرمەچنا . بەلام جە چن رۆی ویەردەنە دیما کە خاتوو شڵێر ڕەسووڵی جەوەرانوەروو دەسدرێژی کەسێوە ، جیای تەسڵیم بیەی ، مەرگش هۆرچنی . شێوەو بەرەنگار بیەو خاتوو شڵێری پەیامێ گەورەن پەێ فیپسگای و بە تایبەت ژەنا کە ڕوانە جە وەرانوەروو دەسدرێژیەکاوە بێ دەنگیشا هۆرچنیەن .
بەلام دەنگ بەرز کەردەیۆ و ناڕازی نیشان داو ژەنا مەریوانی جە چن ڕۆی ویەردەنە ، بە بۆنەو مەرگ و خاتوو شڵێرێ یاگێ ئۆمێدینە . چاڵاکی ژەنا مەریوانی نیشانە ئاگا بیەو ژەنان بە ئا زۆڵم و ستەما کە دەوڵەت و فیپسگای پیا ساڵار بە شێوەی سیستماتیک پێ دەسدرێژی سەروو ژەنا و مافەکاشا شەرعیەتشا پەنەدەنێ . پسۆ کۆمسیونوو ژەنا پڵاتفۆرموو هۆرام-ی سەرەڕاو شەرمەزار کەردەو گرد جۆرێ دەسدرێژی ، سووک وینای و جیاوازی مافی بەین و ژەن و پیای ، پشتیوانی وێما جە چاڵاکی ژەنا مەریوانی پەێ بن بڕ کەردەو ویر و دەسەڵاتی پیاساڵارانە نیشانە مذێمێ . باوڕما ئانەن کە پێ یاوای پەێ فیپسگایە یەکسان و ئازاد و یاواو ژەنا پەێ مافەکاشا ، وێ ڕیکوستەی و پەنە یاوناو وێشا پەنەوازێنێ .
کۆمسیۆنوو ژەنا پڵاتفۆرموو هۆرام-ی
