بە پاو ئا هەواڵا کە جە بەشە تایبەتەکا دلێ سیستموو جمهووری ئیسڵامی کەوتێنێ بەر . جمهووری ئیسڵامی ئێرانی چن ساڵین ئامادەکاری پێ هەر ئەگەرێ کەرۆ کە ئامانجش سناریۆ بە سووریە بیەو ئێرانی بۆ. جمهووری ئیسڵامی جە جەنگوو سوریەی سەرەراو گردوو شکەست و کۆشیاو بە هەزاران ئەنداما سەر بە ڵەقەکا سپاو قۆدسی ، زەینەبیەو و فاتمیانی ، دوێ دەسکەوتێ پێ وێش دەس وستێ ، یۆهەم ، درێژکەردەو ماوەو حۆکمرانی جمهووری ئیسڵامی بە دوور وستەو جەنگی جە خاکوو ئێرانی ، دوهەم دەس وستەو تەجرۆبەو جەنگی چریکی و رێکوستەو لایانەکا جە وەرانوەروو سەرهۆردا گەلا ئێرانی .
جمهووری ئیسڵامی ئیرانی جە ماوەو یەرە ساڵی ویەردەینە ، جە بەروو مەرزەکا وێشۆ جە لاو شێعەکاوە پێ زەربەدای ئۆ نەیاراش دەسەڵات و خاکوو وەڵاتا عێراقی ، ئەفغانستان و عەرەبستانیش کەرد مەیدانوو جەنگی و ئاژاوە نیایۆ و سەروو ئی سیاسەتەیە بەردەواما . بەلام جە گردی مەترسیدار تەر پێ سەروو گەلا ئێرانی ، جمهووری ئیسڵامی بە رێکوستەو فرەو لایانە تیرۆریستەکا هەرێمەکەی و رێککەوتەی چەنیشا ، ئامادەکاریش پێ هەر ئەگەرێ کە ئێرانش گنۆنە کەردەن . جمهووری ئیسڵامی دووبارە بیەیۆ سناریۆ سوریەی پێ ئێرانی فرە بە ئەرینی وینۆ . سەروو ئا ئەساسەیە بە رێکوستەو گرووپە تۆندرەوەکا جە دلێ ئیرانینە ، یاگێ و جۆغرافیای تایبەت و چاڵاکی هەر لایانێش دیاری کەردەن .
تاڵبان : تاڵبان پسۆ یۆ چا لایانا کە جە ئەفغانستان و پاکستان ساحێبوو هێز و ریکوستێوە تایبەتیا ، کاریگەری خاسش سەروو خەلکوو بەڵووچوو ئێرانیوە هەن و تاوانش دلێشانە رێکوستەی بە هێزش بۆ . سەروو ئا ئەساسەیە هەرێموو سیستانوو بەڵووچستانی پێ تاڵبانی دیاری کریان ، کە هەر کات و سات گەر هجوومێ کریا سەروو ئێرانی جە وەرانوەروو سەرهۆرداکا بەڵووچستانی دەس کریەوە با . جمهووری ئیسڵامی هەر پاسە بە پرۆژێوە ئەمنیەتی بە ئامانجوو بەشکەردەو پارێزگاو بەڵووچستانی کە نزیکەو ١٣% جە خاکوو ئێرانیش گێرتەنەرە هەرمانە پێ زیاتەر کۆنترۆڵکەردەو ئا گەلەیشە وستەن بەرنامەو ئەمنیەتی وێش.
ئەڵقاعدە : یۆتەر جە گرووپا ئاڵقاعدەن کە فرەو ئەندامەکاش کە عەرەبێ وەڵاتە ئیسڵامیەکانێ ، رژیم جە ناوچە عەرەبەکا پانیشتوو ئیرانی پسۆ خووزستان ، بووشار ، بەندەر عەباس و ئەهواز ئەنداموو لاینگەرەکاش رێکێ وستێنێ . یاگێ باسینە کە فرەو ئەنداما ئەڵقاعدەی جە هەرێموو ئیزەی بارەگاشا پێ وەش کریەنێ و چێروو نامێ جیاوازی ئاماو لوایشا هەن .
بەسیج و حزب وڵا : دەۆڵەت پێ سەرکۆتکەردەو دەنگە نارەزائیەکا هەرێمە فارس و ئازەریەکا ، هێزێ فرە جە بەسیج و حزبو ڵا و لۆبنانیش بە شێوەتایبەت پەروەردە کەردەن کە ئامادەگی جەنگوو کۆجیە و کۆڵانیشا فێر کریەنێ . ئی هێزە نزیکەو پەنجا هەزار کەسا بەراورد کریان کە فرێچشا زوانوو فارسی خاس قسێ کەرا . کە جە دما سەرهۆرداکا گەلا ئێرانی رۆڵی تایبەتشا جە شارە گەورەکا ئێرانی بێ .
ئێخوان و سەڵەفی : جمهووری ئیسڵامی بە تەجرۆبە جە باکور و پانیشتوو کوردستانی جە دماو سال ٢٠١٥ جە ڕاو ڕابەڕا کاک ئەحمەدیا رۆژهەڵاتوو کوردستانی کە خەتێ جە ئێخوانەکانێ تاوانشا رێککەوتنێوە تایبەت پێ کەمکەردەو رێکوستەو حزبە نەیارەکاش رێکوزۆ . بە پاو رێکەتنەکەو جمهووری ئیسڵامی فرەو ئیدارە ، ڕاوەبەری ، مەسئووڵ و مەعلمێ مدرەسەکا جە لاو ئێخوانەکاوە بریا ڕاوە . هەر پاسە ئێخوانەکا رۆژهەڵاتوو کوردستانی یۆ جە ئەرکەکاشا ئانەن سیستموو جمهووری ئیسڵامی جە هەریمە کوردیەکانە یەک دەس کەرا تا کەسانێ سەر بە لایانە نەتەەئیەکا یا چەپەکا دوور وزاوە . هەر پاسە یۆ تەر جە هەرمانەکاشا ئانەن کە جە ڕاو ئێخوانەکا تورکیەی و باشوور کوردستانی مەعاملە تجاری و دەس وستەو زەرە خارجیەکا پسۆ دۆڵاری پی رژیمی فەراهەم کەرا .
بەلام جە بەشێ تەر جە پیڵان گێڵناکەو رژیمی فرەو مزگی و ناوەندە دینیەکا رۆژهەڵاتی دریەنێ دەسو سەڵەفیەکاوە ، بە جۆرێ داعشێ کە ڕابەرەکەشا دووراو دوور خامنەئیا . تاومێ پاسە واچمێ ئیسە رۆژهەڵات یەرێ لایانێ دەسشا گێرتەن سەرشەرە ، یۆهەم سپاو و ئیتڵاعات کە کارشا مڵیتاریزە کەردە و دەس وستەو زانیاریا ، دوەم ئێخوانەکێ کە ناوەندە مەدەنی ، خزمەت و ئیداریەکا دەۆڵەتی بەر ڕاوە ، یەرەم سەڵەفیەکێ کە کەوتێنێ گیانوو کۆمەڵگای .
