دەستەو پاڵپەشتی (داکۆکی) جە مافەکۍ خەڵکو هەورامانی جە کۆنگرێۋی رۊچنامەۋانیەنە داۋاکاریەکۍ خەڵکو هەورامانیشان ئاشکرۍ کەردۍ و یەک هەفتە مۆڵەتش بە حکومەت دا تا کەدەیێشان بکەرۆنە.
دمابەدمای ئانەیە کە رۊو جمەی ژمارێۋ کەسایەتیۍ و چالاکۋانۍ خەڵكو هەرێمو هەورامانی جەکۆنیشتێۋەنە یاۋێ هەنتری و پێۋەرە باسشان جە کێشۍ، گیروگرفتەکا و نەبییەی خزمەتگوزارییەکاو هەرێمەکەیشان کەرد و خەمسەردی حکومەتو هەرێمو کوردستانیشان ۋەرانۋەر بە هەورامانی هۆرسەنگنا، بڕیارشاندا بێ بە دروستکەردەی ”دەستەو پاڵپەشتی (داکۆکی) جە مافەکۍ خەڵکو هەورامانی“. دەستەکە دەسنیشانش کەردەبۍ رۊدیارو دمانیمەڕۊو (شەممە ٢۵/٠٢/٢٠٢٣)ی، جە شارو بیارۍ دەستەکەشان کۆنگرێۋی رۊچنامەۋانیی ڕێکبۋزۆنە. جە کۆنگرە رۊچنامەۋانیەکەنە داۋاکاریەکۍ خەڵکو هەرێمو هەورامانی پەی دەسەڵاتو هەرێمی و رای گردیی ئاشکرۍ بکەرۊنە.
جە ئی چوارچۋنە ”دەستەو پاڵپەشتی جە مافەکۍ خەڵکو هەورامانی“ ئارۊ جە وەختو وێشەنە کۆنگرە ڕۆژنامەوانییەکەنەش ئەننامدا و ژمارێۋی فرۍ جە هاموڵاتیا و دەزگاکۍ یاۋنەری ئامادێش بیۍ.
جە کۆنگرە رۊچنامەۋانیەکەنە داۋاکاریۍ و گلەیەکۍ خەڵکو هەورامانی جە دەسەڵاتی جە ئەرەیاۋنایێۋەنە ۋزیۍ رووە.
د.ناجح گوڵپی، نۋیسەر و پەیجۆرکار بە هەورا ی و کۆساڵان عەبدولمەجید، رۊچنامەۋان و چالاکۋان بە سۆرانی ئەرەیاۋناکەشان واناۋە کە جەمیانشەنە دەستنیشان کریان:
خەڵکو سەربەرزو هەورامانی، جە وەختێوەنە ئی پەیامەتا ئاڕاستە مکەرمێ کە خاک، زۋان و کەلتورو ناوچەکەیما ئینا چێرو مەتەرسیەنە کە جە لایەن دەسەڵاتی و چنڎ سەرمایەدارۍ چەم چنۆکێۋە ڕووبەڕوو دلێشیەینە بیێنێۋە.
ئا زەمین و خاکە کە نەوە دماو نەوەی پەی ئێمە پارێزیان، جە ئیسەنە خەریکا جە دەسما بشۆنە. تەنانەت نەتەوە یۆگێرتەکۍ ئاماژەش بەئانەیەدان کە زۋانو هەورامی خەریکا دلێنەمشۆنە.
بەشێوە جەئی کەمتەرخەمیا مەگێڵۆوە پەی وەرپەرسە هەورامییەکۍ دلۍ حکومەتو هەرێمو کوردستانی کە سەرو ڕەنجو زەحمەتیەکاو خەڵکو هەورامانی یاۋێنۍ ئا پلە و پایەیە، هەرپاسە بێدەنگی خەڵکو هەورامانی ڕاش دان تا لایێ جە هەورامانی نەکریۆوە. پەوچی رووە مکەرمێ خەڵکو وێما و داواشا وەنە مکەرمێ بيدەنگی ماڕا و داۋاو مافەکاو وێشا بکەرا.
ئێمە پێسە ”دەستەو پاڵپەشتی جە مافەکۍ خەڵکو هەورامانی“ ئی داۋاکاریا وزمێ وەر دەمو حکومەتو هەرێمی و ئەگەر تا یەک هەفتە پەیما چارەسەرۍ و کەردەییشا نەکەرۆ، ناچارێنمۍ جادەو مەرزو تەوێڵێ شۆشمێ بوزمێرە و ڕاگیری کەرمێ جە کار و هەرمانۍ و بازرگانی جە مەرزەکەنە.
داواکارییەکێیچ ئینێنۍ:
١- زیادکەردەو وەختو پەنەداو کارەبای نیشتیمانیی کە بەداخۆ جە ٢٤ ساعاتێنە تەنیا ٨ ساعەتێ کارەبا مڎریۆ بە خەڵکو شارۍ و دەگایەکاو هەورامانی.
٢- وەش کەردەیۆ جادەو تەوێڵۍ تا گردی گۆ-ی کە سەرەڕاو دابین کەردەو بودجەی تایبەتی پەیش، بەڵام تا ئیسە جێبەجێ نەکریان.
٣- دابین کەردەی دکتۆر، داودەرمان و کەرەسەی پزیشکی پەی بنکە تەندروستیەکاو هەورامانی کە فرە جارۍ خەڵکو هەورامانی پەی چارەسەرێ گولانە ناچارێنۍ ڕووە بنیا هەڵەبجەی و سلێمانیۍ.
٤- دابین کەردەی ئاوەو واردەیۆ کە سەرەڕاو بییەی سەرچەمۍ و هانۍ فرێ جە هەورامانەنە، بەڵام جاری پاسە هەن حەفتێوەنە نیم ساعەت ئاوی واردەیۆ مدریۆ بە خەڵکەکەی. وشکەساڵی فرەو باخەکاو ژینگەو هەورامانی رووبەرووۍ وشکبیەی کەردێنێوە و وەرپەرسەکۍ دەسەڵاتیچ جیاتی چارەسەری، بێدەنگیشا وورچنیەن.
٥- چارەسەرکەردەی گرفتە پەروەردەییەکۍ بەتایبەت دابین کەردەی مامۆسا و کەرەسەکاو وانای کە بەداخۆ فرەو یاگانە بەهۆکارو نەبییەی مامۆسای یان وانگای مسیارەکۍ (وانکارەکۍ) ناچارێنۍ بلانۍ یاگەکا تەری پەی وانای.
٦- ڕێکۊستەیۆ کەرتو گەشتیاری (گەشتو گێڵی) بە شێوازێ کە گونجیۆنە چەنی سروشت و ژیوگەو هەورامانی و کەمترین زەرەر و زیانش بۆنە، نەوەک بەداخەوە چڎن سەرمایەدارۍ بە پاڵپشتی حکومەتی دەسشا دان تێکدای ژیوگەو لادەگایەکاو هەورامانی.
٧- دەسبەجا مدرنای هەرمانۍ جە پڕۆژەو فراۋانکەردەی جادە و ڕاو دلۍ دەگاو زەڵمی و سەرچەمەکەیش.
پەشتگۆشوستەی خزمەتگوزارییە سەرەتاییەکۍ جە هەورامانەنە بە ئەنقەسا و ئامانج جە ئانەیە چۆڵکەردەو هەورامانیا کە بە داخەوە ساڵانە چڎەنها کەسۍ و خێزانۍ بە یەکجاری هۆرامانی مازانۍ جیا و بار کەرانۍ پەی شارەکاو هەڵەبجەی و سلێمانیۍ و ووردە ووردە دەگایەکاۍ رووەو چۆڵبییەی ملانۍ.
