پڵاتفۆرموو هۆرام-ی بە بۆنەو ڕۊو جەھانیی زۋانی ئەڎایی و ٨ هەمین ساڵرۆ ئەڕەمەڕزنایرەو پڵاتفۆرموو هۆرام-ی ئەرەیاۋنێۋەش ۋەڵاو کەرڎۊ.
خەلکوو وەشەویس و هۆرامانی ، جە ئاژێوەنە یادوو ڕۊو جەھانیی زۋانی ئەڎایی ( ٢١-٢ ) و ٨ هەمین ساڵرۆ ئەڕەمەڕزنایرەو پڵاتفۆرموو هۆرام-ی کەرمێوە کە ئاخێزوو ژەنی ژیوای ئازادی بیەن بە هیوایە پەێ یاوای بە ئازادی . ئاخێزێ کە سەرکەوتەیش زامنوو پارێزناو بەها ئینسانیەکا و سرووشتیەکا نەتەوەکەیما چەنی وێش مارۆ . زوانیش پسۆ یۆ جە بەشە مۆهێمەکا ئەژناسای هەر میڵڵەتێ ، بەشێن جە خەزێنەو فەرهەنگ ئینسانیەتی بە گردی . زوان پسۆ گیاندارێن کە گەر خزمەت نەکریۆ ، مڕۆو جە بەین مشۆ . ئاڕۆ داگیرکارا ئاو و خاکی هەر پاسە دەسەڵاتدارە مڵهۆڕەکێ پەێ مەنەیۆ وێشا بە گرد شێوە دەسشا دان فۆتنای و ئەوە تاونایۆ زوان و فەرهەنگ و میڵڵەتە چێر دەسەکا .
ئێمەیش پسۆ هۆرامی و بەشێ جە نەتەوەو کوردی کە ساحێب و زوان ، فەرهەنگ و شانس و تایبەت و وێمانمێ و زوانەکەیچما بە بۆنەو بیەو سیستمە نادموکراتیکەکا هەرێمەکەی ڕوە جە بەین شیەی مڵۆ . جە ئاژەو ئاڕۆ ئێرانی وینمێ کە ئاخێزوو ژەنی ژیوای ئازادی چنە یاگێ هیواو و ئۆمێدینە پەێ یاوای بە مافەئینسانی و سرووشتیەکاما ، جە ئەگەروو سەر نەکەوتەیش دوێ ئنە تەرسەنە پەێ جە بەین شیەو زوان ، فەرهەنگو شناسەکەیما . چوونکی بێوە دەسەڵات سەر گنۆ بە خراپتەر جە جارانی دەس مذۆ سەرکۆت کەردەی و وەر گێرتەی گرد چاڵاکیە مەدەنی .
پۆچی یاگێ وێشەنە کە خەلکەکەما بە ویری کریاوە و ژیرانە پەێ سەر وستەو ئاخێزوو ( ژەنی ، ژیوای ، ئازادی ) هەر هەنگامێش پەنە منڕیۆ ، هۆرش گێڕۆ . ئاخێزێ کە پاسەش کەردەن کە ژەنی جە وەرانوەروو پیا ساڵاری ، ژیوای جە وەرانوەروو نایەکسانی و ئازادی جە وەرانوەروو چێڕ دەسەیی وێشا ڕێک وزا . جە گەرما و گەرموو ئاژەو ئاڕۆینە وینمێ کە فرە کەس و لایانی پەێ یاوای بە دەسەڵاتی گەرەکشانە زەحمەتو ڕەنجوو فیپسگای مجاڕە کیسەو دەسەڵاتدارا . سەروو ئا ئەساسەیە ، ئێمە پسۆ پڵاتفۆرموو هۆرام-ی جە ڕوێ پسۆ زۋانی ئەڎایی سەڕەڕاو مۆبارەک کەردەو ئی ڕوەیە ، ٨ هەمین ساڵڕۆ پڵاتفۆرموو هۆرام-ی مۆبارەک بایی ماچمێ .
هەر پاسە تا یاوای بە مافە ئینسانی و سرووشتیەکاما سەڕەڕاو ڕەخنە گێرتەی جە کەم کاریەکا وێما ، پەێ یاوای بە فیپسگایە ئازاد و دیموکراتیکی جە وەرانوەروو سیستمە مڵهۆروو دیکتاتورەکا کە ئەساسشا سەروو یەک زوان ، یەک پەرچەم ، یەک دین و یەک ڕەنگیا مدرمێ. پۆچی گرد جارێ ماچمێ ژیوای مدرامانا و مدرامان ژیوایا .
دەسەو ڕاوەبەرێ پڵاتفۆرموو هۆرا-ی
١٩-٢-٢٠٢٣
