جە نۆەمین ساڵوەگېڵ و قڕکەرڎەی ئیزیدیکا پڵاتفۆرموو هۆرام-ی پشتیوانی وێش پەێ سەروستەو داواکاریەکا کوردا ئیزئیدی نیشانەدا .
هەر پاسە کە زانمێ نۆ ساڵێ چێوەڵتەر جە ڕوی پسۆ ٣-٨-٢٠١٤ واڵە و برا ئیزیدیەکێما جە لاو هێزە قیزەونەکا داعشی و تورکیەی وەرانوەروو قڕ کەردەی بییەوە . جە تاریخوو ئیزیدیەکا پسۆ فەرمانی ٧٤مینی نامێش بریا . هێرش و ساڵەو ٢٠١٤ بە ئامانجوو تاونایۆ و قڕ کەردەو بنەڕەت و شناسوو کوردا ڕیکوزیا . باوڕدارا ئیزیدی پسۆ بەشێ کۆن جە فەرهەنگ ، زوان و باوڕداری گەلوو کوردی کە تا ئاڕۆ جە وەرانوەروو شناسوو داگیرکارا مدرامانشا کەردەن کریە ئامانجوو وەحشیانەتەرین هێرش و سەردەمی . ئانە کە جە ٣-٨-٢٠١٤ سەروو ئیزیدیارە ڕوەشدا تەنیا هێرشێ سادە نەبێ . قڕ کەردەو ڕۆح ، ڵەش ، فەرهەنگ ، زوان ، باوڕی ، وەڵات و بیەو نەتەوێوە بێ .
ئانە کە دەسش جە قڕ کەردەو ئیزیدیەکانە دیارا ، چانەی مشۆ فرە کەسێ داعش و تورکیەی پسۆ هۆ سەرەکی وینا . بەلام وەختێ پەیجۆریە مەیدانی گنا وەروو دەسی ، وینمێ کە پارت و دیموکرات و کوردستان و عێراقی بە سەرپەرەشتی خانەوادەو بارزانی هام دەسێ ئی قڕ کەردەیە بییەنێ . جیا ئاستەو شەنگاڵی جە لاو هێزەکا سەر بە باڕزانی بە بێ هیچ مدرامانێ ، یۆ چا هۆیانە کە بی بە هۆ قڕ کەردەو واڵە برا ئیزیدیەکاما . بەلام نەبیەو ڵەشکەرێ یۆگێرتەو کوردا جە وەلێ ٣-٨-٢٠١٤ یۆتەر جە هۆکارەکا قڕ کەردەو ئیزیدەیکا وینیۆ . بەلام دماجار ویناما کە یۆگێرتەی هێزە کوردیەکا پسۆ یەکیەتی نیشتمانی کوردستانی ، یەپەگە و یەپەژەی و هەپەگەی جە وەرانوەروو داعشی و تورکیەی بی بە ڕەمزوو سەرکەوتەی و ئازادی شەنگاڵی .
جە نۆەمین ساڵوەگېڵ و قڕکەرڎەی ئیزیدیەیکا پسۆ پڵاتفۆرموو هۆرام-ی سەرە ڕاو شەرمەزار کەردەو هێزە جیهانیەکا کە جە وەرانوەروو قڕ کەردەو واڵەو برا ئیزیدیەکاما بێ دەنگێ بێنێ . خیانەتوو پارتی و خانەوادەو بارزانی ڵەعنەت کەرمێ . هەر پاسە نەبیەو هێزێ نەتەوەیی پەێ پارێزنای گەلەکەیما جە وەرانوەروو هەر هێرش و داگیرکاریە بە یۆ جە هۆکا قڕ کەردەو گەلەکەیما و داگیرکاری وەڵاتەکەیما چی سەەردەمەنە وینمێ . دماجاریش وێما بە بەشێ جە کۆمەڵگاو ئیزیدی وینمێ و پەێ ئازادی یەکجاری و سەر وستەو مافەکاشا چێش پسۆ ئەرکی پەیما دیاری کریۆ گێرمێش وێما . هەر پاسە ئاژەو ئارۆ کوردستانی ئانەی وازۆ کە بە گرد جۆرێ پەێ پاڕێزناو وێڕاوەبەری شەنگاڵی یۆ گێرتەی نەتەوەیی وێما جە گرد وەختێ زیاتەر بە قەوەت کەرمێ.
ڕاوەبەری پڵاتفۆرموو هۆرام-ی
