بەیاننامەو پڵاتفۆرموو هۆرا-ی بە بۆنەو سی و یەرەهۆمین ساڵرۆ شیمیایی وارانوو شاروو هەڵەبجەی .
گەر چەمێ گیڵنمی بە ویەردەو گەلەکەیمارە، فرە کارەساتێ گەورێ و تاڵێ وینمێ کە پەێ ئانەی مشیا کە پسۆ تراژدیای جیهانی دریا قەڵەم . هەر دەسەڵاتێ کە پەێ ئامانجوو داگیرکاری ڕوەش کەردێبۆ وەڵاتەکەیما پەڵێوە سیاوش جە دماو وێش جیا ئاستەن . جە دوەسەد ساڵی ویەردە کە ویروو دەۆڵەت – نەتەوەی باڵش کێش سەروو وەڵاتارە ، جیهان گەورەتەرین جەنگەکا و کارەساتەکا تاریخیش بە وێشۆ دێیە . ویروو دەۆڵەت – نەتەوەی بە پەشت بەستەی بە ناسیۆنالیسمی و فاشیستی دینی خۆڵقێنەرێ فرەو کارەساتەکا بێیە.
کارەساتوو هەڵەبجەی جە ١٦-٣-٢٠٢١ یۆ چا کارەساتانە کە بەرهەموو فاشیزمی نەتەوەیی و دینی کە جە تایبەتمەدنیەکا دەسیستموو ۆڵەت – نەتەوەینێ بێ . بە جۆرێ تاومێ واچمێ کە سیستموو دەۆڵەت – نەتەوەی سەروو ئاساسوو تاونایۆ ، جە بەین بەردەی ، ئینکارو و کۆشتەی درێژە بە عەمروو وێش مدۆ . تا وەختێ کە سیستموو دەۆڵەت – نەتەوەی بالا دەست بۆ زۆڵم ، کۆشتەی ، قەنارەدای ، ئینکار ، جیاوازی و ئەشکەنجە بەشێنێ جە ژیواو کۆمەڵگای و نەتەوە چێردەسەکا .
ئاڕۆ جە دماو ٣٣ ساڵا بە پەیجۆریە مەیدانیەکا پەیما بەرکەوتەن و ئاشکران ، گەر دەۆڵەتوو بەعسی بە جەستە خۆڵکوو هەڵەبجەیش جینۆساید کەرد ، جە وەهاروو ساڵوو ١٩٨٨ ی تا ئاڕۆ دەسەڵاتوو جمهووری ئیسڵامی ئێرانی جە ڕاو وەلا کەردەیۆ مادە هۆشبەرەکا ، ئەرەمەرزنایرەو کۆگا جاسووسیەکا ، وەلا کەردەیۆ تۆموو تەفرێقەی و هەر پاسە شۆرتەیۆ مەژگوو جوانا جە ڕاو لایانە کوردیەکا سەر بە وێش چێروو نامێ دینیوە هۆژموونی وێش سەروو خۆڵکی و هەرێموو هەڵەبجەیرە چەسپنان . بە دڵنیایی تاومێ واچمێ ٣٣ ساڵێن دەسەڵاتێ داگیرکەر پسۆ جمهووری ئیسڵامی ئێرانی بە شێوە نەرم ، زوان ، شناس ، ویر و باوەری و بیەیما کۆمکۆشت کەڕۆ .
پسۆ پڵاتفۆرموو هۆرام-ی سەرەڕاو بە بەرز و پیرۆز یاد کەردەیۆ یادوو شەهیدا هەڵەبجەی ، ڕەخنەی تۆند ئاراستەو دەسەڵاتدارا حکوومەتوو هەرێمی کەرمێ کە سەرەڕاو ئانەی سی و یەرێ ساڵێن جە وەرانوەروو ئازارەکا خۆڵکوو هەڵەبجەی و ئاوەدانی هەرێمەکەی کەمتەر خەمێ بێیەنێ ، بەلام پەێ قازنجی مادی و شەخسی بە ڕادای بە داگیرکەرا کوردستانی پسۆ ئێرانی و تورکیەی پەێ تێکداو کەسایەتی ، کۆمەڵگا و کەڵتوورو و گەلەکەیما جە پارێزگاو هەڵەبجەینە بەشدارێنێ و ڕاشا پەێ کۆمکۆشتەی چەرمە کە ئاسەوارش کەمتەر جە کۆمکۆشتەکەو ١٦-٣-١٩٨٨ی نیا وەشە کەردێنە .
جە سی و یەرەهۆمین ساڵرۆ کارەساتوو هەڵەبجەی داواما جە خۆڵکەکەیما ئانەن کە بە رێکوستەی وێشا و ئەرەمەرزنایرەو وێڕاوەبەری هەرێمی ، پەێ رزگار بیەی جە هۆژموونی دەسەڵاتوو داگیرکارا و هەر پاسە دەسەڵاتە دیکتاتورەکا هەرێمی هەنگامە بنیا . مشۆم ئانەما ویر نەشۆ تا دەسەڵاتە ناوەندگەراکێ پسۆ دەۆڵەت – نەتەوەی بیەیشا بۆ ، مشۆم گرد ڕوێ چەمەڕاو ئانەی بیمێ کە کارەساتێ پسۆ هەڵەبجەی ، شەنگاڵ ، رووبووسکی ، خۆرماتوو و عەفرینی ڕوەما کەرا وەنە .
:
پڵاتفۆرموو – هۆرام-ی
١٥-٣-٢٠٢١
