جە هۆرامان جەئەڎێ بی و جە بۆتان بەفەرمانداری گیانش بەختکەرد.

هەپەگە: فەرماندە ھۆشمەند ئەداک خەڵکو ژیوارو هۆرامانی جە دمای مدرامانی قارەمانانە بۆتان شەهید بییەن.

هەرێمو هۆرامانی چ جە ویەردە و جە ئیسەنە کارا بەشدارو شۆڕشی و سەرهۆردای و ئاخێزەکانو کوردستانی بییەن و پەیوەست بە ئانەیە هەزاران ڕۆڵێ وێش  پێشکەشێ وڵاتی و نیشتمانی کەردێنێ.
جە شۆڕش و ئاخێزی نونە بە ڕابەرایەتیی پەکەکە-ی و ڕابەر عەبدوڵا ئۆجالان-ی، دیسان هۆرامیەکێ بەفرەیی بەشدارێ بیێ و سەڎان کوڕێ و کناچی هۆرامانی جە وەرکەوت و پانیشتو کوردستانی پەیوەستێ شۆڕشی و ئاخێزی بیێ و ئانڎێوشان یاوێنێ تا بەرزتەرین ئاستو فەرمانداری و پێشەنگی شۆڕشی و دەیانیچشان گیانشان کەردەن قوربانو نیشتمانی و ووڵاتی و ئامانجەکانو شۆڕشی و جمیەرو ئازادی.
یۆ جە گیانبەخشا و شەهیدانو هۆرامانی، فەرماندە ھۆشمەند ئەداک خەڵکو دەگاو ژیوارو هۆرامان-یەن کە نزیک بە ٥ ساڵی پەیاپەی سەرەتا جە قەندیل و دمای تەمامنای پەردەوەی سیاسی، فکری، ئیدۆلۆژی، گەریلایەتی و قاڵ بییەی جە فەلسەفەو ڕابەر ئاپۆیەنە، جە هۆرامانەوە تا هەرێمەکێ پارێزنای مەدیای، مەیدانەکێ کۆشای جە پانیشت و سەرنیشتو کوردستانی کارا کۆشان و هەر ئەرک و وەرپەرسیاریێ هەر چەنڎە سەختیچ بیەبۆنە و پنەنەش بەخشیابۆنە بەگاش ئاوردەن. 
هەر ئانەیچە بییەن هۆکار تا بەزوویی پلێ و قۆناخەکێ کۆشای و خەباتی ببڕۆنە و هەر زوو و جە تەمەنێوی کەمەنە ببۆنە بە پێشەنگ و فەرماندە و بە درێژایی و پانتایی جوگرافیاو کوردستانی گەورەی یاگە پا و جا بەنجێ و شۆنەوارو کۆشاییش بئازۆنە جیا و ببۆنە بە سومبول و نمونە و هاندەر پەی هامڕاکاش بە تایبەتی و سەرجەم جەوانا بەگردیی.
 
بەپاو ئەرەیاونایێ کە میانگەو یاونەری و چاپەمەنی هێزەکانو پارێزنای گەلی- (هەپەگە) وەڵاوشکەردەنەوە، فەرماندە ھۆشمەند ئەداک جە هەرێمو هۆرامانی جەئەڎێ بییەن و بەشدارو جمیەرو ئازادی و کۆشای گەریلایەتی بییەن و دەرنجام جە هەرێمو بۆتان-ی سەر بە سەرنیشت (باکور)و کوردستانی جە مدرامان و ڕووبەڕووبییەو سپا ئەرەگێرەکەو تورکیایەنە جەدمای نیشاندای قارەمانی جە ئاستی فرە بەرزەنە، شەهید بییەن و پەیوەست بە کاروانو گەشمەردا و نەمرانو کوردستانی و ئانزانیەتی بییەن.

میانگەو یاونەری و چاپەمەنی (هەپەگە)ی جە ئەرەیاوناکەشەنە نامێ و شناسنامە و یاگۍ و کات و ساتو شەهیدبییەی فەرماندە (ھۆشمەند ئەداک)یش بە ئی جۆرە ئاشکرا کەردەن: 

نامێ و کودو کۆشای: دڵخواز بینگۆل
نامێ یانەی: ھۆشمەند ئەداک
ڕێککەوت و یاگۍ جەئەڎابییەی: ١٩٩٦ دەگاو ژیواری/ ھەرێمو ھۆرامانی
نامێ ئەڎێ: مینا
نامێ تاتەی:عابید
ڕێککەوت و یاگۍ بەشداربییەی: ٢٠١٧ باشماخ 
یاگۍ شەهیدبییەی: کێلا مەمێ/ هەرێمو بۆتانی
ڕێکەوتو شەهیدبییەی: ١٩و گوڵانو ٢٠٢١ی