ساڵەو ١٩٨٢ فرەو خەباتکارا کوردێ بە بۆنەو ماڵوێرانی و دەسەڵاتوو فاشیزموو دۆڵەتەکا ئێرانی و عێراقی و تورکیەی روەشە کەردە وەڵاتوو سۆئیدی . چاوەختەنە کەسێ بە نامێ ئۆڵف پاڵمە پسۆ سەرۆک وەزیرانوو ئا وەڵاتەیە جە وەرانوەروو ئاوەارەگی کورداوە هەڵوێستش نیشانەدا و جە رۆنامەو ئافتۆنڵادات واتش : ئێمە کوردەکا پسۆ نەتەوێوە کە شناسوو وێشا هەن مژناسمێ : ئا زڵمێ کە ئینا سەروو کورداوە ناڕەوانوو مشۆم مدرۆ .
جە لایەتوەر بە سەرهۆرداو ئاخێزوو چەکداری پەکەکەی جە ١٥-٨-١٩٨٤ دۆڵەت و تورکیەی جە ڕاو ئیمتازێ فرێ بە دۆڵەتە ئەرووپائیەکا تاواش دەسەڵاتوو ناتۆی دژ بە هێزەکا گریڵای قەناعەت پەنە بارۆ . دۆڵەتە زڵهێزەکا بریتانیای ،ئاڵمان و ئامریکا جە کۆم کۆشتەو کوردا دەسێ باڵاشا بێ . بە یاری داو چەکداری و واڕایۆ زانیاری جە وەرانوەروو کورداوە تاوناباری فرەشا جیا ئاست .
ئی قۆناخە پاسەش کەرد کە سەرۆک وەزیرا تورکیەی جە ٢٣ ئۆکتۆبروو ١٩٨٥ سەرداو سۆئیدی کەرۆ و قەناعەت بە سەرۆک وەزیرا ئا وەڵاتەیە بارۆ کە واز جە پشتیوانی کوردا بارۆ . جە دماو ئا سەفەرەیە سازمانوو ئیتڵاعات و سۆئیدی ( ساپۆ ) جە ڕاو رۆنامەکا سۆئیدی و بە هەمیاری کەسانی کە جە پەکەکەی جیا بییەبێنێ دەسشدا سیاو کەردەو پەکەکەی و گریڵای . بە جۆرێ کە وەرەپەرسوو یەکەموو ساپۆی بە ئاشکرا دژ بە پەکەکەی کەوت قسە کەردەی . ئی قسێ بە پێچەوانەو ویر و باوروو سەرۆک وەزیرانوو ئا وەختەو سۆئیدیوە بێ ،
تا ئانە کە جە وێرەگا وەختەو ٢٨ -٢-١٩٨٦ جە وەختێ کە پاڵمە چەنی ژەنەکێش جە سینەمانە ئۆما بەر ، پەشتیوە جە لاو کەسێوە چن گرۆڵیەیش وەر کەوت . سۆئید بە یەکجار جە راو ساپۆی پسۆ دەزگاو ئیتڵاعاتی ئا وەڵاتەیە گرد یاگەنە پەکەکەش پسۆ تاوانباروو ئا کارەساتەیە دا قەڵەم . هەر چا وەختەنە بەرێز ئۆجالان پەیامێشدا و واتش ئینە پیڵانێ رێکوزیا و هەر پاسە جیهانیا دژوو گەلوو کوردی. ئاژەو ئا سەردەمەیە پاسەش پەنە ئۆما کە کورد بیەی تاوان بێ . کەسێ تیرۆر کریا کە وێش داکۆکی جە مافەکا گەلو کوردی کەرێ . چەنی کریۆ کورد زەرەر دۆ ئە وێش ؟
ئی وەزعێ پاسە ڵوا کە زەرەرێ فرەش ئۆ خەباتوو کوردا دا ، فرە ئینسانێ خەباتکارێ چێروو نامێ تیرۆرینە گرد بێ رێزیەشا پەنە کریا . تا ئینە جە دماو ٣٤ ساڵا دۆڵەت و سۆئیدی بەرش وست کە کۆشتەو پاڵمەی بە دەسوو کەسێ بیەن کە جە ساڵەو ٢٠٠٠ دوە هەزاری مەردەن . پی جۆرە پەروەندەو کارەساتەکەو ٢٨-٢-١٩٨٦ بە شێوە نادیار ئاشکرا بی . بە جۆرێ کە دادوەروو باڵا و سۆئیدی بێ تاوانی پەکەکەیش بەر وست . دماو ئی ئاسکرا بییەیە پارێزەرەکێ پەکەکەی داواو بەر ئاردەو نامێ پەکەکەیشا جە لیست و تیرۆروو ئەرووپای کەرد .
بەلام ئایا دۆڵەتوو سۆئیدی و دۆڵەتەکا ئەرووپایی سەروو گردوو تاوانبارەیکاشا داواو ئەنەوییەردەی جە کوردا کەرا ؟ یا پسۆ مەسەڵێ هەڵەبجەی وزاش پەشتەو گۆشا و وێچشا مەکەرا بە ساحێبش ؟
