خەبەرێ

سەڵاحەدین دەمیرتاش: دەنگەکاو کوردی ئەنجاموو ورچنیایەکاو تورکیای یەکلایی کەراوە

سەڵاحەدین دەمیرتاش، هامسەرۊکی وەڵینوو پارتی دیموکراتیکوو گەلا (هەدەپە) و دیارتەرین نەیاروو “ڕەجەب تەیب ئەرڎۊگان”ی جە زیندانۊ قسێش کەرڎۍ و واتش، ئینە خاستەرین دەرفەتوو وەرڎەموو ئۊپۊزیسیۊنوو تورکیاین پەی دووروستەیۊ سەرۊکوو وەڵاتی.

سەڵاحەدین دەمیرتاش، هامسەرۊکی وەڵینوو هەدەپەی وەڵۍ زیندانیکەرڎەیش جە ساڵەو ٢٠١٦، جە جوابوو ڕۊنامەو فاینانشاڵ تایمزینە واتش، ئا ئۊپۊزیسیۊنە یۊگێرتە کە کورڎەکا جە وێش گێرۊ، متاوۊ ڕا گێرۊ جە خزای تورکیای بەرەو «دیکتاتۊرییەت».

جە جوابوو پرسیارەو پارێزەرەکەیشنە، دەمیرتاش واتش، تورکیا خەریکا بەرەو دیکتاتۊرییەت هەنگامە منیۊ، حەرپاسە ماچۊ، «ئەگەر ئەرڎۊگان ئی بەرۊوە، تورکیا پا منیۊ قۊناغێوە تازەو دیکتاتۊریەتیوە».

حەرپاسە واتش: «ئەرڎۊگان جە ڕاو بەشکەرڎەی گلێرگەیۊ، تاواش جە دەسەڵاتنە مەنۊوە. یۊگێرتەی ئۊپۊزیسیۊنی فرە گرنگا، نەک حەر پەی سڕیەیۊ ئی جەمسەرگیرییە، بەڵکوم پەی بەرڎەیۊ ورچنیایەکایچ».

بە پاو ڕۊنامەکەی، دەنگەکاو کوردی یەکلاکەرەوێنۍ جە ورچنیەی سەرۊکایەتی و پەرلەمانوو تورکیاینە، کە قەرارا جە ١٤ ـو ئایارینە بلۊ ڕاوە.

هەدەپە بەڕسمی نەلان دلۍ ئا هامپەیمانێتییە شش‌قۊڵیوە، کە پاڵپەشتیی “کەمال کلیچدار ئۊغلۊی” کەرا پەی سەرۊکایەتی.

دەمیرتاش واتش: «حیچ پارتێوە بەبۍ پاڵپەشتیی کوردی مەیاوۊ دەسەڵات. کورڎەکۍ چی ورچنیەینە یەکلاکەرەوۍ با».

وەلێم دەمیرتاش، کە داراو بنکێوە جەماوەریی گەورەین، بەینوو پارتی دیموکراتیکوو گەلانە، بە پاو ئا تویتا، کە پارێزنەرەکێش وەڵاشا کەرڎەنۊ، ماچۊ: هەڵای قەرارش نەدان پەی پاڵپەشتیکەرڎەی “کەمال کلیچدار ئۊغلۊ”ی پێسە حەوڵێوە پەی دماییئارڎەی بە دەسەڵاتوو ئەرڎۊگانی.

سەرۊکوو تورکیای چی ورچنیەینە ڕووبەڕوو دژوارتەرین تاقیکەرڎەیۊ بۊوە، چونکە دۊخی سەختوو ژیوای و کەمتەرخەمیی دەوڵەتی جە بومەلەرزەکەو شوباتینە، گورزێوە کوشندەن جە دەنگەکاو پارتی داد و گەشەپەنەدای (ئاکەپە)ی.

دەمیرتاش سەبارەت بە کلیچدار ئۊغلۊی، کە سەر بە تایفێوە عەلەوین، جە دەوڵەتێوەنە کە فرێشا سەر بە مەزهەبوو سوننەینۍ، حەرپاسە جە مەنتێقێوە کوردنشیننە پەیدا بییەن، ماچۊ: «حەوڵی دڵسۊزانێش بیێنۍ پەی فاڕیای و دیموکراسی». حەرپاسە واتش: «کورڎەکۍ دەسچنۍ سەرۊکایەتیی هامبەششا بۊ» و «گەشوین»ۍ بێنی بە هەڵمەتەکۍ کلیچدار ئۊغلۊی، وەلێم هەڵای چەمەڕوانۍ با وەڵۍ قەرارڎاینە.

Z