ئەرەیاوناو پڵاتفۆرموو هۆرام-ی دژ بە بڕیاروو قەنارەداو چوار جوانێ کوردی جە لاو جمهووری ئیسڵامی ئیرانیوە
خەلکوو وەشەویس و کوردستانی ، هەر پاسە کە زاندێ رژیموو جمهووری ئیسڵامی هەر وەخت جە بەروو وەڵاتی فشارێش گنا سەر ، جە دلێ وەڵاتینە دەس مدۆ هجوومی سەروزی و قەنارەداو جوانا . جە درێژەو ئی سیاسەتە نا ئینسانیەو رژیمی ، هەواڵوو ئەگەروو قەنارەدای چوار زیندانییە سیاسییاو کوردی بە نامەکاو (پەژمان فەتحی ، موحسن مەزڵوم ، وەفا ئازەربار و محەمەد فەرامەرزی) جە زیندانوو ئەوینوو تارانینە بیەن بە مایێ نیگەرانیی گەلوو وەکەوتوو کوردستانی و ئازادیوازاو ئێرانی بە گردی . یاگێ وێشەنە کە هەر کەس و لایانی بە هەر چۆرێ کە پێش کریۆ بۆ بە دەنگوو گیریایا سیاسی و بە تایبەت ئی چوار جوانە کە ئەگەروو قەنارەدایشا فرەتەر بیەن .
جە ویەردەو دەسەڵاتوازی دیکتاتورەکا ڕاسیەوە سەلمیان ، کە هەر یاگەنە کە زۆڵم و ستەم فرە بیەن دیارا مدرامان و کۆشیای دژ بە دیکتاتورەکا فرەتەر بیەن . جە ئاژەو ئاڕۆ ئیرانیچەنە ئی ڕاسیە پەێ گرد کەس و لایانێ بەرگەوتەن . رژیموو جمهووری ئیسڵامی ڕوە دمائینەکا مەنەیۆ وێش جە دەسەڵاتەنە مژماڕۆ . خەڵکوو وەرکەوت و کوردستانی و گەلا تەروو ئێرانیچ جە دماو سەرهۆرداکا ئاخێزوو ژەنی ژیوای ئازادی ئینەشا پەێ بەر گەوت کە ڕژیم جە وەرانوەروو ئیرادەو خەڵکی نمەتاوۆ وێش پارێزنۆ . مشۆم ئا ڕاسیەچە باس کەرمێ کە بازرگانی کەردەی دەۆڵەتە زڵهێزەکا جیهانی بە پەرسەو ماف و مرۆڤی جە سەردەموو ئاخێزوو ( ژەنی ژیوای ئازادی ) فرەتەر جە جارانی جە وەرانوەروو دیکتاتورەکا جیهانی بە تایبت دەسەڵاتدار ئێرانی بەرکەوت . پۆچی پەێ مدرناو قەتاروو قەنارەداو جوانا جە لاو رژیموو جمهووری ئیسڵامی ئێرانی ، تەنیا پەشت بەستەیا بە باوەڕی ە ئیرادەو خەلکەکەیما و ئازادیوازا جیهانی .
سەروو ئی ئەساسەیە ئێمە پسۆ پڵاتفۆرموو هۆرام-ی سەرەڕاو شەرمەزار کەردەو سیاسەتەکا جمهووری ئیسڵامی ئێرانی و بە تایبەت جە قەنارەداو زینانییا سیاسی ، داوا جە گرد کەس و لایانێ کەرمێ پەی ڕاگێرتەی جە قەنارەدای ئی زیندانییە سیاسییا و تەماموو زیندانییا تەری ، پەنەوازەن بە شێوە کردەوەیی جە دلێ و بەروو وەڵاتی با بە دەنگوو زینانیا سیاسی . بێدەنگی هەر یۆ جە ئێمە مانا ، مەنەیۆ ئی ڕژیمە مڵهۆرەیە جە دەسەڵاتەنە فرەتەر مازۆوە . بە پێچەوانەکەیچ هەر هەنگامێ و کردەوێوە جە وەرانوەروو سیاسەتەکا ڕژیمی تاوۆ قەتاروو جە قەنارەداو جوانا کوردی و ئێرانی مدرنۆ .
ڕاوەبەری پڵاتفۆرموو هۆرام-ی
٢٨-١-٢٠٢٤
