٢ۍ رێکوزیۍ مافەکا مرۊڤی ئەرەیاۋناشا کە جە ئێرانەنە بە مەڵامەتو ‘تەرسنایۊ’ ‘مەکینەو مەرڎەی’ وزیان ھەرمانە و باسشا چانەی کەرڎ کە ساڵەی ۋیەرڎۍ جابەجۍ کەرڎەو سزاو جە قەنارەدای بە رێژەو ٧٥ % زیاڎش کەرڎەن.
رێکوزیاو مافەکا مرۊڤو ئێرانی کە بارەگاکەش ئینا نەرویج و یۊبیەی دژوو سزاو جە قەنارەدای کە ناۋەنڎەکەش ئینا پاریس ئەرەیاۋناشا؛ کە ساڵەو ٢٠٢٢ لانیکەم ٥٨٢ کەسێ جە ئێرانەنە دریێنۍ قەنارە. ئەرەیاۋیا؛ کە ئا ژمارە جە جابەجۍ کەرڎەو سزاو جە داردای بەرزتەرین ئاستش تۊمارکەرڎەن جە ساڵەو ٢٠١٥یۊ. حەر بەپاو گوزارشتەو هەردوۋە رێکوزیاکەی جە ساڵەو ٢٠٢٣چەنە لانیکەم ٣٣٣ کەسۍ جە قەنارە دریێنۍ.
جە گوزارشتە ھامبەشەکەنە ئامان، “سزاو کوشتەی جارێۋەتەر جە لایەنو رژێمو ئێرانیۊ پۍ درێژەدای بە دەسەڵاتەکەیش پېسە ئامرازێۋە سەرکوت کەرڎەی و فشاری بەکار مارۊۋە”. ڕاۋەبەرو رێکوزیاو مافەکا مرۊڤی “مەحمود ئەمیری موقەدەم” ئەرەیاۋناش: “حکومەتو ئێرانی پۍ تەرسنای و تۊقنای ۋێنیشاندەرا پەناشا پۍ زیاڎ کەرڎەو جابەجۍ کەرڎەو سزاو جە داردای ئا کەسا بەرڎەن کە بە مەڵامەتو تۊمەتێۋە جیا جە ھەرمانۍ سیاسیۋە سزادریێنۍ، زیاڎشا کەرڎەن.
موقەدەم داواش جە گلېرگەی میان نەتەوەیی کەرڎ کە پۍ مرڎناو ‘مەکینەو مەرگو رژێمو ئێران’ی هەنگامە و ڕێۋە پێۋیسا گێرانە ۋەر. جە گوزارشتەکێنە ئانەیچ وزیان ڕوۋە کە نزیکەو ١٠٠ بەندکریایایچ تەرسەو سەپناو سزاو جە داردایشا سەرا.
