بۆنەو ڕۆو جەهانی زوانی ئەڎایی و ساڵیاڎوو مەرزنایرەو پلاتفۆرموو هۆرام ی، جە شاروو مانچستەری جە وەڵاتو بەریتانیای مەڕاسیمێوە بریا ڕاوە.
مەڕاسیمەکە بە ئاماڎەبییەو ژمارێوە فرە جە هەورامیا ئەرەنیشتا شارە جیاوازەکاو بەریتانیای و بە ساتێ مدرای پەی گیانو بەخت کرییایا ڕاو ئازاڎیی کوردسانی دەسش پەنە کەرد و دماتەر بە پێشکەش کەردەو چن وتارێوە زوانەوانی و ڕۆشنۋیری دۊڵەمەن کریا . خاتوو فەریبا ڕەحیمی بە وتارێ سەروو تاریخوو رۆ زوان و ئەڎایی و گرنیگی ئی روەیە پەێ هۆرامیا ، خاتوو فرێشتە مۆستەفایی بە وانایۆ چن شێعرێ جا شاعرا هۆرامانی ، دوکتور کاوە داوەری کورد وتارێش سەروو تاریخوو چن هەزار ساڵەو هۆرامانی باس کەرد . دمایی جە لاو هەر یۆ جە هۆنەرمەندا کاک فەرزاد شۆکری و کاک مەحیەدین جاف چن بەزمێ سیاو چەمانە و چەپڵێ پێشکەش کریە . جە درێژەو مەراسمەکەینە پەیاموو یانەو ژەنا هۆرامانی جە لاو خاتوو ئارەزوو ڕەحیمی وانیاوە . جە پەیاموو یانەو ژەنا هۆرامانی ئامابێ کە ژەنا هۆرامانی ئەرکێ قۆرس ئینا سەروو شاناشاوە و پەێ پارێزنای زوانەکەیما مشۆم زیاتەر وێشا ڕیکوزا . هەر پاسە جە بەشێ تەر جە پەیامەکەیشانە دەسەڵات و پانیشتوو کوردستانی ڕخنە کریابێ کە بە ئەرکوو نەتەوەیی وێش هۆر نەئێستەن .
جە بەشێ تەر جە مەڕاسیمەکەنە سەرو نامێ پلاتفۆرموو هۆرام ی کۆششکار زەردەشت هۆرامی بابەتێوەش پێشکەش کەرد و واتش : پیرۆز کەردەو ڕۆو زوانی ئەڎایی و ساڵیاڎوو مەرزنارەو پلاتفۆرمو هۆرامی ئەرکێوە ئەخلاقی و نەتەوەیی و فەرهەنگیمانە و ئەشۆ تا پارێزناو یەکجاری زوانەکەیما گرد ڕوێما ڕۆو زوانی ئەڎایی بۆ تا جە فەوتنای پارێزنمێش.هەرپاسە داواش کەرد کە مشیۆ چی قۆناغەنە گردیما هەوڵو ڕێک وستەی و یۆگیری بڎەیمێ تاوەکو زوانما فەرهەنگما کلتورما جە فەوتنای پارێزنمێش و ئی هەنگامێچە پێویستش بە کەردەیۆ فێرگەی هەن چ بە ئۆنلاین یا کڵاس تاوەکو زاڕوڵەکاما فێرو زوانی ئەڎاییشا کەرمێ و بە فەرهەنگ و کلتوری هەورامیانە پەروەردەۍکریا
جە دما بەشو مەڕاسیمەکەیچەنە بە گۆرانی واتەی و ووڕپڕای مەڕاسیمەکە پیرۆز کریا.
